Nikku: Qanga pisimasut kinguneqareerput

Sermitsiaq.AG-mi ullumi tusagassiutigineqarpoq maanna Partii Naleraq sinnerlugu qinigassanngortittoq, Nikku Olsen, ilumut Inatsisartunut qinigaasinnaanersoq.

Sermitsiaq.AG-mi allaaserineqartumi pineqarpoq, 2013-mi qinersinerup kingorna Nikku Olsenip 2005-mi nakuusersimanini pissutigalugu Inatsisartunut qinigaasimagaluarluni isinngitsoornera, tamannalu Qinigaanerup Misilinneqarnissaanut Ataatsimiititaliamit aalajangerneqarpoq. Pineqartoq tassaavoq sakkortuumik patitsisimanera pissutigalugu akiligassiissutimik kinguneqartitsisoqarsimanera.

Pisimasoq maanna Inatsisartunut qinersinissamut atatillugu qaqinneqaqqimmat Nikku Olsenip paasisinnaanagu oqaatigaa.

– Inuttut kukkussutikka pillagaassutigereerpakka aamma nangittumik inuttut kanngunarsarneqarnera akuersaarsinnaanngilara. Iliuuseqarneq inuttut tatiginassutsinnik sequtseriniarneruvoq aamma uanga supajuttut saqqummiunniarneqarpunga, Nikku Olsen nunarput.gl-mut oqarpoq.

– Taamani kukkussutigisimasara naatsorsuutiginngilara aammalu pillagaassutigeqqissallugu. Allatuulli inuiaqatigiinni atugassaqartitaavunga, Nikku oqarpoq.

– Taamaattumik akueriuminaatsippara Sermitsiaq.AG-p tungaaniit qinigaassinnaaninnut apeqqusersuiniartoqarmat, aamma eqqumiiginerpaasara tassaavoq ammasorsuarmik paasiniaajutigalutik tusagassiornermik ingerlatsimmata, Nikku Olsen oqarpoq.

 

Aaqqissuisut

Nunarput pillugu sammisaqarfik

%d bloggers like this: