NATO qaninnerusumik suleqatigineqassaaq

Kalaallit Nunaata avannaarsuata kangiani taamatullu Nordvestpassagemi immap angallavigineqarsinnaanerata annertussiartornera ilutigalugu pisariaqaleriartorpoq immami sikulimmi angalasinnaanissamut piginnaasaqarnissaq.

Taamak Suleqatigiissitsisut sinnerlugit Inatsisartunut qinigassanngortittoq, Tillie Martinussen isumaqarpoq.

Taanna oqarpoq, Suleqatigiissitsisut Danmarkip oqaloqatigineqarnissaanut kissaateqartut, taamalu Kalaallit Nunanni issittumi imarsiornermut ilinniarfeqalernissaa anguniarneqassasoq.

– Sakkutuut Kalaallit Nunaanniinnerat iluatsillugu kalaallit inuusuttut piginnaasaqarnerulersinnissaat periarfissatsialaavoq. Inuusuttorpassuit atuagarsiorlutik ilinniarniarusunngitsut sakkutuut aqqutigalugit ilinniarnissaminnut periarfissinneqarsinnaapput. Tamatuma peqataanik sakkutuut umiarsuaanni kalaallit inuttaasut amerlanerit iluaqutigineqarsinnaalissapput, aalisarnermut nakkutilliinermi aamma annaassiniarnermi.

Tillie Martinussen oqarpoq, NATO-mi iligisat aggersarusukkitsik, taamalu peqatigaluta issittumi ilinniarnermik ingerlatileqqullugit

– Issittumi imarsiornermut ilinniarfik aamma inuinnarnik imaatigut angallassinermut attuumassuteqartinneqarsinnaavoq, tassami ilinniarfiup umiarsuarni inuinnarnik angallassisartuni naalagassat aamma ilinniartittarsinnaavai. Imarsiornermi ilinniarfimmi ilinniarsimassuseq qaffassassavarput, ilinniarluarsimasullu pigilissallugit, taanna oqarpoq.

– Peqataanik Kalaallit Nunaata sillimanissakkut inissisimanera, nunallu allat akornanni inissisimanera iluaqutissarsivigisinnaalissagaluarparput, piginnaasanik ineriartortitsineq aamma nunarsuarmioqatitsinnik suleqateqarneq aqqutigalugit, Tillie Martinussen oqarpoq.

Aaqqissuisut

Nunarput pillugu sammisaqarfik

%d bloggers like this: