Isak ilaquttanilu.

Napparsimasoq ikiorumaneqanngilaq

Isak John Josenius qaqutigoortumik nappaateqarpoq. Nappaat innarluutilinnguussutaasartoq Europamiusut taaguuteqarpoq Multiple kartilaginøse exostoser, nappaatillu ilisarnaatigaa saarngit tinumasoqalertarmata. Tinumasut saarnginut iloqianngortitsisinnaapput, aamma sianiutinut taqqanullu naqittaarillutik aalasinnaanermut akornusersuisunngortarput.

Isak John Joseniusip meerai ilanngullutik nappaammik kingornussisimapput, nappaallu nakorsartinnikkut ikiorserneqarsinnaannani qanoq ineriartornera paaqqutarineqartussaavoq.

Isaap maannamut qanoq iliornissani pillugu pisortat utaqqisimavai.

– Nunatsinni nappaat akuerisaanngilaq. Suleqqusaajunnaaramali ukioq ataaseq qaangiuppoq, maannamullu sumilluunniit pisartagaqarsinnaanernik tunineqarumanngilanga, naak nappaatiga pissutigalugu nakorsamiit suleqqusaajunnaarsimagaluarlunga, Isaaq oqarpoq.

– Ukioq ataaseq ingerlasimalerpoq, saaffiginnittaraluaramalu akissutisineq ajorpunga. Aamma nappaat pillugu tarnilerisumik oqaloqateqarusukkaluarnikka akineqarumanngillat. Pisortaqarfiit ajornaqaat, Isak John Josenius oqarpoq.

– Nappaat akuerisaanngimmat nunatsinni misissuineq uninngavoq aamma akiuussutissaqanngilaq, tassami ilaatigut aaliangersimasumiinnani saarngit tamaasa aqqusaartarmagit. 2017-imi apriilimi suleqqusaajunnaaramali nammineq isertitaqarunnaarpunga. Maannamut aapparisannit ikiorneqarlunga napavunga, tassami saaffiginnittaraluarnikka kinguneqarneq ajorput. Politikerit ilanngullugit saaffigisaraluarpakka, kisianni tassa ajornaqaaq, Isaaq oqarpoq.

Nappaat qaqutigoortuusoq ataavartumik misissortittarnermik nassataqartarpoq, tassami tinumasut peerneqartarnissaat pisariaqartarsinnaavoq. Meeqqat pineqartillugit saarngit nakorsaanit misissortittarnissaat inassutaavoq.

Qanormi meeqqatit. Misissortittarpat, soorlu Danmarkimi?

– Danmarkiliarsinnaanngilagunngooq aamma iluaqutiginaviannginnatsigugooq annerusumik. Allatut ajornartumik massakkut annermik ujartorparput, qanoq ilillunga siusinaarlunga soraarninngornissannut pisartagaqalersinnaanersunga, ilami sulisinnaanera killeqaqigami, Isak John Josenius oqarpoq.

Nunarput pineqartoq pillugu pisortaqarfimmut apeqquteqaateqarpoq.

 

Nappaat pillugu
Nappaat Multiple kartilaginøse exostoser katsorsarneqarsinnaanngilaq taamaallaallu malunnaatai passunneqarsinnaapput. Pilattartilluni tinumasut peerneqartarnissaat pisariaqalersinnaavoq. Meeqqat pineqartillugit ataavartumik saarngup nakorsaanit misissortittarnissaq ilisimasalinnit inassutaavoq. Inersimasut pineqartillugit nappaatip ajoqusiineri assigiinngitsorujussuusinnaapput, taamaattumillu inummut pineqartumut ataavartumik passunneqarnissaq naleqqussarneqarluni ingerlanneqartussaavoq.