Namminersorlutik Oqartussat tillikujuttut

PFA Soraarnerup Kalaallit Nunaanni atorunnaarsinneqarnerata kingorna utoqqalinersiassanut katersat Danmarkimut nuunneqarput. PFA Soraarnerup matuneqarneranut pissutaasutut oqaatigineqarpoq, Kalaallit Nunaanni utoqqalinissamut ileqqaarneq naammattumik ineriartortinneqarsinnaanngitsoq.

2018-mi januaarip aallaqqaataani Finanstilsynip matusinissaq akueraa, taamalu ilanngullugu nuussinissaq akueralugu.

Atuartartoq saaffiginnittoq oqarpoq, ukiaq Qimatut pensionimut nuutsinissani piukkutilerlugu kattuffimminut attaveqarsimalluni. Taamani ilisimatinneqarsimavoq tusarniaasoqareermanngooq nuunnissaallu ilaasortanit isorineqarsimanngimmat, periarfissaq matoreersimasoq.

– Uanga tusarniaanermik tusagaqarsimanngilanga, taanna oqarpoq.

– Bankinnut paasiniaagama oqarput, 2017-mi decemberip 15-at tikillugu nuussinissamut periarfissaqarsimasoq. Taamaasilluni nuussagukkit 55-65 procentii danskit naalagaaffianut nakkartussanngorpoq, taanna oqarpoq.

Sisamanngormat allakkat nakkartitsivikkut nakkartinneqarput.

– Taakku atuarlugit paasilerpara Kalaallit Nunaanni naalakkersuisut nuussinermut akileraarusiissimasut. Tupinnarpoq utoqqalinersiassattut ileqqaakkakka naatsorsuutigisimasakkalu siumut akileraarusersorneqarsimammata. Soorlulusooq ilisimareersimagaat taamanikkussamut qanoq akileraartoqartassasoq. Isumaqarpunga tamanna siunissannik tillinniarnerusoq, saaffiginnittoq oqarpoq.

Taanna oqarpoq, Qimatut pensionimut nuussagunigit naatsorsuutigigini katillugit 80 procentit naalakkersuisut danskillu naalagaaffiata tigussagai.

– Qularnanngilarlu aamma PFA qaavatigut tigusassaqarumaarpoq. Uffa kiffaanngissuseqartinneqarsimasuuguma tamaasa tigullugit nammineq toqqakkannut aningaasaliissutigisinnaagaluarlugit, taamanikkussamullu tigooraaleruma piffissami tassani atuuttumik akileraartarlunga, taanna anersaaruluppoq.

 

Aaqqissuisut

Nunarput pillugu sammisaqarfik

%d bloggers like this: