Naliliineq: Qinersinissaq allatut ajornarmat nalunaarutigineqarpoq

AAQQISSUISUT. Marsip tallimaanni Inatsisartunut qinersinissaq Naalakkersuisut siulittaasuannit nalunaarutigineqarpoq.

Inatsisartut Siulittaasoqarfiat nalunaarpoq, Inatsisartut marsip ulluisa 13-ianni nalunaaqutaq aqqanermut immikkut ittumik ataatsimiigiaqquneqarsimasut, tassani Inatsisartunut qinersinissaq kisiat oqaluuserineqassalluni. Qinersinissaq apriilip 17-ani imaluunniit 24-ani aalajangiunneqassasoq naatsorsuutigineqarpoq.

Nuna innuttaasunik qinersisitsisarnikkut ingerlanneqarmat, qinersisitsinissamik nalunaaruteqarneq immikkut tupaallaatissaanngilaq, aamma pingaartumik qanorluunniit ukioq manna Inatsisartunut qinersisoqartussaammat.

Immikkulli maluginiagassaq tassaavoq, qinersinissamik nalunaaruteqarneq ulloq taannarpiaq aalajangiunneqarsimarpasilluni, pipallattumik naalakkersuisut siulittaasuannit nalunaarutigineqarmat. Politikkikkut sulinerup iluani qaqugukanneq qinersisoqarnissaa qanimut suleqataassut tamarmik ilisimakannertarpaat, uanili taamaattoqarpasinngilaq.

Nunarput tipisiuinerata kingorna paasinarsisoq tassaavoq, naalakkersuisut siulittaasuat marsip tallimaanni ullaakkut iterami qinersisitsinissamik nalunaaruteqarnissamik sinnattugaqarsimanngitsoq. Ulloq nalinginnaatillugu suliartorsimassaaq. Ullulli ingerlanerani iliuuseqartariaqarlersutut misigisimalersimassaaq, minnerunngitsumik inuiaqatigiinnut ilisimatitsissutigisariaqakkat annerusumik nassuiaatissaqartinnagit ukioq qinersivissami nalunaaruteqartoqarsinnaanngimmat. Eqqissilluni unnukkut sinissaguni piffissaagallartillugu iliuuseqartariaqartutut misigisimalersimassaaq.

Siullertut
Sivisuumik inuit akornanni ilisimaneqarpoq, mittarfiliortitsinissat naalakkersuisooqatigiit akornanni unerisimannginnermik pilersitsisartut. Tassani annermik pineqarpaluttartoq tassaavoq, mittarfiit qanoq akeqarnissaasa tutsuiginanngitsumik apeqqusersorneqarsinnaasumillu suliarineqarsimanerat. Mittarfiliortitsinissanut naalakkersuisut avataaniit sulisitsillutik ukiut ingerlanerini nalunaarusiortitsisarsimapput.

Killiffillu unaalersimappat, naalakkersuisooqatigiit akornanni tunngavilersuutiginiakkanut atsioqataajumajunnaartoqarsimasoq, taava suliniummut taamak akisutigalunilu annertutigisumut uppernassuseqarluni oqariartortoqarsinnaanngilaq – aamma tutsuiginassutsi tamaat sapanginnagu tamanna pisinnaanngilaq. Ajornannginnertut aniguiffissaq tassaavoq, pineqartoq nalunaarutiginagu, qinersisitsinissamik nalunaaruteqarneq. Taava qineqqusaarneq uppernassuseqakannerluni ingerlanneqarsinnaassaaq, aamma ilisimasariaqakkat pisariaqavissut ilisimatitsissutiginngikkaluarlugilluunniit.

Aappaattut
Naalakkersuisooqatigiit partiittut inuttullu akunnerminni tunngaviusumik pingaartitat eqqarsaatigalugit assigiinngitsorujussuarmik isiginnittariaaseqarlutik inissisimapput, aamma Inuit Ataqatigiit Siumullu iluanni ingerlavissat marluk assigiinngitsut noqittaassutigineqarput: Naalagaaffinngornissaq ingerlavigineqassanersoq, imaluunniit Naalagaaffeqatigiit iluanni suli sivisuumik ingerlatsiinnartoqassanersoq. Qularutissaanngitsoq tassaavoq isummersortarnikkut kingulleq ajugaasarsimassammat, tassami 2009-mi juunip 21-anili namminersuleratta, ulloq manna tikillugu suliakkiissutigineqartut pillugit annerusumik alloriaqqittoqarsimanngilaq. Taamaattumik partiit taakku annerit marluk iluminni aaqqiagiinngissuteqarnerat naalakkersuinikkut suliniarnermut kigaallassaataaginnaratik aamma ipianngunartarsimassapput.

Alloriaqqittoqarsimannginneranullu pissutaasoq ataasiusimassaaq: Aningaasameerneq. Ukiut ingerlanerini aatsitassarsiorneq isumalluutigineqarsinnaanngitsutut isikkoqariartuinnarsimavoq, taamaattumillu inuit ilutigisaanik aningaasarsiornikkut pilersitsiortornerulersimanngimmata, Naalagaaffimmit tapiissutit suli isumalluutigineqarput, aamma amerlassusaat taamak isikkoqarmata ineriartortitsinissamut inissaqartitsisoqanngillat.

Pingajuattut
Naalakkersuisooqatigiit akunnerminni inuttut kinaassusaat soorunami assigiinngillat, aamma pingaartumik isummertariaatsit anguniagaqarususseqarnerlu eqqarsaatigalugit. Ilaat, qularnanngitsumillu amerlanerit, naammagittarneralutik naalakkersuisooqatigiinnut ilaasortaapput, ilaallu anguniakkaminnik pinaaseraluarlutik allaffissornikkut akimmisaartinneqarnerminnik qatsussilluinnarsimasutut isikkoqarput. Tamanna takornartaanngilaq, aamma inuiaqatigiit akunnitsinni allaffissornerup ‘pissaaneqarpallaarnera’ uteqqiasumik oqaluuserisarparput. Tamannarpiaq pissutigalugu soraarsitsinerit – imaluunniit allamut inissiinerit – atugaasartut naluneqanngilaq, aamma ullaaq taanna taamak pisoqarsimassasoq paasinarpoq. Assigiinngissulli tassaavoq, naalakkersuisut siulittaasuata taamak pisoqarnera akuersaarsinnaanngimmagu, taamalu isumassaarutivissimaffiup nalaani qinersisitsinissamut suaaruteqarnissamut periarfissatsialattut akorlugu.

Taavami
Kingullermik qinersisoqarpoq 2014-mi novembarip 28-ani. Ullumikkut marlunngornermi marsip arfernganni ullut 1.195-it – imaluunniit ukiut pingasut, qaammatit pingasut ullullu arfineq-marluk – ingerlasimalerput, piffissallu ingerlanera tamaat naalakkersuisut qanoq anguniagaqarlutik sulinertik annerusumik inuiaqatigiinnut ilisimatitsissutigisarsimanngilaat. Qinersinissarlu maanna nalunaarutigineqarmat qularnanngilaq suliarpassuit suugaluarnersut torrallataaqqisutut ilungersorlutik nassuiaasersorniarsarissussaassavaat.

Qinersilluarisi.

Aaqqissuisut

Nunarput pillugu sammisaqarfik

%d bloggers like this: