Naligiinneruneq immikkoortitsinerunngilaq

Inuit tamarmik naleqarput, aamma asasarisaq, ammip qalipaataa, suiaassuseq upperisarlu apeqqutaatinnagit. Siumut sinnerlugu Inatsisartunut qinigassanngortittoq, Suinni Fleischer Johansen isumaqarpoq, inuiaqatigiit aaqqissugaaneranni naligiimik periarfissiisoqarnissaa anguneqartariaqartoq.

– Innuttaasut piginnaasatik tamakkiisut atorsinnaasariaqarpaat. Piviusorli imaappoq periarfissaritinneqartut naligiinngittarnerat annertusangaarmat oqartoqarsinnaasoq immikkoortiterisoqartoq. Taamaammat ullut tamarluinnaasa naligiinnerusumik periarfissiinissaq siuarsartuarneqassaaq, Suinni Fleischer Johansen oqarpoq.

Taanna isumaqarpoq, suliniutit amerlasuut eqqunngitsumik immikkoortitsiniaanerunerarneqartartut. Assersuutigaa Naalakkersuisuniit atorfinitsitsiniarnermi piumasaqaatit kalaallisut oqalussinnaanissamik imaqartinneqartut.

– Inuiaqatigiit aaqqissugaaneranni immikkuutaartut aaliangersimasut allaninngaanniit periarfissagissaarnerutinneqarpata, taava inuiaqatigiittut suliassarivarput tamanut naligiinnerusumik periarfissiissutigissallugu. Takussaavorlu inuiaqatigiit aaqqissugaaneranni periarfissagissaarnerpaasutut inissisimasut immikkoortiteriffigineqarnerminnik oqariartuuteqartarnerat, pingaartumik periarfissagissaarnerpaatitaanerat apeqquserneqaleraangat.

– Naligiinnerusumik periarfissiinissamut suliniutit immikkoortitsinertut taassallugit kukkuneruvoq, tassami immikkoortitsinermik annikillisaaniarnerummata. Inuiaqatigiinni naligiinnginneq atorneqarsimappat, naligiisitaanissamut oqariartuuteqarneq immikkoortiterinertut taaneqartarpoq.

– Tamatta aallutsigu naligiimik periarfissiinissaq, unittoorfiginagu periarfissagissaarnerpaasimasut allatulli periarfissagissaarnerpaajunnaarnissaat. Innuttaasut amerlanerpaat periarfissinneqarnissaat nunatsinnillu kivitseqataanissaat aqqutissiuutsigu, Suinni Fleischer Johansen oqarpoq.

 

Aaqqissuisut

Nunarput pillugu sammisaqarfik

%d bloggers like this: