Nakorsat qullersaasa taartissaat nanineqarpoq

Februaarip naalernerani peqqinnissaqarfimmi nakorsat qullersaat, Assia Brandrup-Lukanow, peqqinnissaqarfiup aqutsisoqarfiani ukiup affaanik sivisutigisumik atorfeqareerluni matorluilluni soraarpoq. Suna pissutaanersoq erseqqinnerusumik ilisimatitsissutigineqanngilaq.

Maanna taartissaa nanineqarsimavoq.

Aamma atuaruk: Nakorsat qullersaat matorluivoq

Namminersorlutik Oqartussat allapput, Berit Bjerre Handberg pilattaanermut atatillugu ilisimajunnaarsitsisarnermik immikkut ilisimasalittut ilinniagaqarsimasoq.

Danmarkimi ilinniaqqittarnermut atatillugu sullissivimmi allattaanertut atorfeqarsimavoq aamma Jyllandip qeqqani peqqissaasutut ilinniartitsisarfimmi allaffimmi pisortatut atorfeqarsimavoq.

Taakku saniatigut Aarhus Universitetimi nakorsatut sulisimavoq, tassani ilaatigut napparsimmaviup ilinniarsimasanik akuersisartuini peqataasarsimalluni.

Berit Bjerre Handberg oktobarip aallaqqaataaniit peqqinnissaqarfimmi nakorsat qullersaatut sulilissaaq.