Naalakkersuisuusimasoq paasissutissanik mianernartunik ingerlatitseqqittarsimasoq

Paasissutissat Naalakkersuisuusimasup isertuussassanik ingerlatitseqqittarsimaneranut tunngassuteqartut Nunarput.gl-imut ilisimatitsissutigineqarsimapput.

Taamani Inuussutissarsiornermut, Suliffeqarnermut Niuernermullu Naalakkersuisoq, Randi Vestergaard Evaldsen, ullumi Demokraatit siulittaasuat, inunnut Naalakkersuisut suliassaqarfiisa avataani inissisimasunut ingerlatitseqqittuussimavoq.

2015-mi novembarip tallimaanni ullulerneqarsimasuni ilaatigut Great Greenlandip qanoq annaaniarneqarsinnaanera pillugu ataatsimiinissaanut, atorfilittanit Naalakkersuisuusut piareersaassunneqarput. Oqaluuserineqartussaq tassaavoq Naalakkersuisut Siulittaasuata Naalakkersuisoqarfiata ataani inissisimasoq, Ingerlatseqatigiiffinnut Allattoqarfik, Great Greenlandip siulersuisuinut qanoq ilioqqusinissamik oqariartuuteqassanersoq. Pappilissallu taakku novembarip arfineq-pingajuanni susassaqanngitsumut isummerfigeqqullugit Naalakkersuisuusimasumit ingerlateqqinneqarput.

Oqaluuserisassatut piareersarneqarsimasoq arfineq-marlunnik qupperneqarpoq, isummerfigisassatullu sammineqarput aningaasalersorneqarnikkut qanoq Great Greenlandi ingerlaqqissinnaanersoq aamma tamatumap ilutigisaanik piniartut qanoq piiaavigineqarsinnaanersut. Naalakkersuisunut oqaluuserisassanngortitaq Inuussutissarsiornermut, Suliffeqarnermut Niuernermullu Naalakkersuisoqarfimmit, Ingerlatseqatigiiffinnut Allattoqarfimmit, Aalisarnermut, Piniarnermut Nunalerinermullu Naalakkersuisoqarfimmit aamma Great Greenlandimit piareersarneqarsimavoq.

2015-mi Great Greenlandimut Aningaasanut inatsit aqqutigalugu 15 millionit tapiissutissatut immikkoortinneqarsimapput, taamaalineranilu angusarluttoqareersimavoq.

Piniartuiaanissaq
Pappilissat isertuussassat naapertorlugit, Naalakkersuisuusimasut piniartuiaanissamik siunertaqarlutik sulisimapput. Eqqartorneqartut ilagaat qanoq iliorluni uteqqiasumik puisinnianut tapiissuteqartoqartarunnaassasoq, aamma qanoq iliorluni tamanna anguneqarsinnaanersoq. Great Greenlandimut tunngatillugu iliuusissatut periarfissat assigiinngitsut 20-it tikkuarneqarput, soorlu ameerniat aatsaat 4.000 koruunit nalinganut ameerniarsimagaanngata tapiissut tunniunneqartassasoq, aamma tunitsivinnik ikilisaanissamik anguniagaqartoqassasoq. Great Greenlandi naapertorlugu Avannaani Kangianilu tunitsivinnik matooraaneq 2 millioninik ileqqaarutaasinnaavoq.

2014-mi tunitsiviit 44-ut ammatinneqarput, tikkuarneqarporlu taakkunannga mikinerpaat matuneqarnissaat nalilersorneqassasoq, taamaalilluni aningaasat 1,3 milliuunit Great Greenlandimut ingerlatinneqarniassammata, aamma natsit amiinik ammerineq unitsinneqassasoq, ammit pigineqareersut aserorterneqassasut, Kopenhagen Furimik suleqateqarneq nukittorsarneqassasoq aamma mersortarfik annikillisaavigineqariarluni matuneqassasoq. Great Greenlandi naapertorlugu mersortarfimmik matusineq 2,4 millioninik ileqqaarutaassaaq.

Piniarnermut Naalakkersuisoqarfik iliuuseriniarneqartunut eqqasuuteqarluni oqarpoq, taamaaliornikkut kulturikkut ingerlatsiviit ikilisarneqassasut oqaatigalugu. Inuussutissarsiornermut Naalakkersuisoqarfik tunngavilersuivoq, Great Greenlandip mersortarfiata matuneqarnerata kingorna mersortarfiit sinerissamiittut ingerlatsisinnaasasut aamma mersortarfiit amerlanerit namminersortunit pilersinneqarsinnaasut.

Taamani Suliffeqarnermut Niuernermullu Naalakkersuisoq, Randi Vestergaard Evaldsen, Namminersorlutik Oqartussat internetimi quppernerannut oqarpoq, isumatusaarnerusoq 2016-mi Great Greenlandimut amerlanerusunik aningaasartuuteqanngikkaanni. Nangilluni taamani erseqqissaavoq, Naalakkersuisunut pingaaruteqartoq piniartut natsit amiinik suli tunisisinnaanissaat, tamannami avinngarusimasuni nunaqarfinni ataatsimut isigalugu inuuniarnikkut isertitaqassutaasarmat.

Naalakkersuisuusimasoq Randi Vestergaard Evaldseni Nunarput.gl-mit ullumi oqaaseqartinniaraluaratsigu oqaaseqarumanngilaq.

Paasissutissanik oqaassisoq oqarpoq, sivisuumik paasissutissat anikkusuttarsimallugit, nangipporlu:

– Pisortani qinersisartunit tatigisaallutik inissinneqarsimasut innuttaasut sinnerlugit suliamik ilumoorussisinnaanngippata, inuiaqatigiit attanneqarsinnaanngillat, aamma uagut inuttut ataasiakkaarluta soqutigisaraarput, uatsinnorpiaq tunngassuteqartut susassaqanngitsunut ingerlateqqinneqartannginnissaat.

– Isumaqarpunga Kalallit Nunaanni naalakkersuinikkut ingerlatsineq perorsimanerusumik ingerlanneqartariaqarlersoq, qanorluunniimmi akuerineqarsinnaanngilaq avataaneersunik ilisimatinneqartussaanngitsunik ilisimatitsisarneq, aamma nunatsinni naalakkersuinikkut ingerlatsineq taamak pisoqartillugu tatiginassutsikkut annertuumik innarlerneqartarpoq. Minnerunngitsumik nunanut allanut niueqateqarnermi aningaasarsiornerup iluani malussaqqajaassorujussuarmik inissisimasoqartarpoq, pissutsillu taamaattut nunatta tatiginassusaanut qaffassaataanngillat, paasissutissanik tunniussisoq oqarpoq.

Oqaassisup kinaanera Nunarput.gl-mit ilisimaneqarpoq.

 

Aaqqissuisut

Nunarput pillugu sammisaqarfik

%d bloggers like this: