Naalakkersuisut: Utoqqarnut politikeqanngilagut

Nunatsinni utoqqartatta ataqqinartut, meeqqat innarluutillillu pitsaasumik sullinneqarneratulli pisariaqartilluinnarpaat inatsisartuni aningaasaliineq aqqutigalugu sullinneqarnissaasa pitsaanerusumik aqqutissiuunneqarnissaat, Siverth K. Heilmann (A) Naalakkersuisunut apeqquteqaatimini allappoq.

– Nunatsinni utoqqaat illersuisoqalernissaannik pisariaqartitsineq atorfinitsitserusunnerlu pillugit, qanoq aningaasartaqartigisinnaaneranut Naalakkersuisut saqqummiussaqarnissaat kissaatigaarput, Siverth K. Heilmann apeqqummini ilaatigut allappoq nangillunilu;

– Siornatigut utoqqarnut siunnersortimik atorfeqartitsineq misilittagaqarfigineqarpoq, ukiunilu makkunani suut tamarmik ineriartorfianni pisariaqartinneqaleraluttuinnarpoq, aalajangersimasunik sulisoqarluni allaffeqartinneqarlunilu politikikkut aningaasaliiffigineqarluni sullinneqarnerup pitsaanerusumik angusaqarfiunissaa, Siverth K. Heilmann allappoq.

Naalakkersuisut akissutiminni qanoq politikeqarnerminnik nassuiaagatik akisussaaffimmik kommuninut miloriussipput, taamaaliornermikkut Naalakkersueqatigiit isumaqatigiissutaanni ‘kissaatit’ innersuussutigalugit.

– 2018-miit 2022-mut naalakkersuisooqatigiinnissamik isumaqatigiissut naapertorlugu utoqqalinerup nuannersuunissaa, aamma utoqqaat sulisinnaassuseqaraluarunik sulisinnaassuseqanngikkaluarunilluunniit atugarissaarnissaat Naalakkersuisut kissaatigaat, Isumaginninnermut Naalakkersuisoq, Anthon Frederiksen, akissuteqarpoq.

– Utoqqarnut suliassaqarfik, meeqqanut inuusuttunullu kiisalu inunnut innarluutilinnut suliassaqarfiit assigalugit, kommunip akisussaaffigivaa. Apeqquteqaat akineqassappat sulisoqarnermut aningaasartuutissat naatsorsorneqarsinnaasunngortinnissaat pitinnagu, Naalakkersuisut kommunillu akornanni suliassaqarfimmi siunissami sunik pisariaqartitsisoqassanersoq sullissinerullu qanoq qaffasitsiginissaannut kissaatigisat politikikkut isumaqatigiissutigineqaqqaartariaqassapput, Anthon Frederiksen akissuteqarpoq.

Naalakkersueqatigiit isumaqatigiissutaat naapertorlugu 2019-imut Aningaasanut Inatsit qanoq imaqarumaarnersoq Nunarput’mit sissueqqissaarneqarpoq. Tassani apeqqut tunngaviusoq pineqarpoq: Qinersineq soqutaasimanngila, aamma partiit politikerillu innuttaasut salliutinnagit systemimut illersuisunngorsimappat?

Aaqqissuisut

Nunarput pillugu sammisaqarfik