Naalakkersuisut: ‘Inuiaqatigiit atugarissaartuupput’

PIITSUUSSUSEQ NALIGIINNGINNERLU. Taamak naalakkersuisut nalunaarusiarititaat kingulleq ataasinngornermi februaarip 26-ani saqqummersinneqartoq qulequtaqarpoq.

Nalunaarusiami sammineqarpoq naligiinnginneq piitsuussuserlu, kiisalu piitsuussutsimut killiliussassamik nunatsinni aalajangiussinissamut periarfissat pillugit nassuiaateqarpoq. Nassuiaateqarneq Inatsisartut 2015-mi upernaakkut peqqusinerata kingorna suliarineqarpoq.

Aallaqqaasiinermi susassaqarfimmut naalakkersuisoq, Sara Olsvig (IA), oqarpoq:

– Piitsuussuseq akiorneqassaaq. Kikkulluunniit piginnaanerminnik ineriartortitsinissamut inuuniarnermilu atugarissaalernissamut periarfissaqannginnerat inuiaqatigiit tamarmiullutik annaasaqaatigissavaat. Innuttaasut ilaasa inuunerminni toqqissisimanissamut, pitsaasumik atuartinneqarnissamut suliffeqarnissamullu periarfissaqannginnerat pissutaalluni innuttaasut ilaasa piginnaasaannik tamakkiisumik atorluaannginneq piitsuussutsip naligiinnginnerullu kingunerisinnaavaa.

Nalunaarusiami nassuiarniarneqarpoq piitsuussuseq naligiinnginnerlu qanoq paasisariaqarnersut, naallu nalunaarusiaq tamaat isigalugu akissutisineqanngikkaluartoq, taamaattoq uteqqiasumik suna pineqarnersoq erseqqissarniarneqartarpoq.

– Piitsuussuseq taaguutaavoq paatsoorneqarsinnaasoq. Inuiaqatigiinni suniluunniit piitsuunerup isumaa naalakkersuineq, ilikkarsimasat inuttullu nammineq isummat tunngavigalugit paasineqartarpoq. Inuiaqatigiinni pigissaartuni piitsuussuseq qaqutigoortuinnartut isigineqartarpoq. Taamaammat piitsuussuseq pineqartillugu aningaasaqarnerinnaq eqqarsaatigalugu isiginiarneqarneq ajorpoq, inuiaqatigiinnili inuuniarnermi atugassarititaasut nalinginnaasut aamma ilanngunneqartarput. Taamatut paasinnittaatsimi piitsut tassaatinneqarput inuit ilaqutariilluunniit pigisanik tigussaasunik inuttullu nukinnik ima annikitsigisumik peqartut, allaat innuttaasut amerlanersaat naligalugit inuiaqatigiinni peqataasinnaanatik, nalunaarusiami naalakkersuisut allapput.

– Innuttaasut sulisinnaasut akornanni suliffissat ikippallaarnerat agguaqatigiissillugu isertitarisartakkat sunnernerliortarpai, naligiinngissutsillu annertusineranut pissutaaqataasarluni. Suliffeqarfeqarfimmi nuttarnerunerup inuiaqatigiinni aningaasaqarnikkut naligiinneq annertusitissinnaavaa. Tassunga atatillugu aalisarnerup sanaartornerullu iluanni ataavarnerusumik suliffissaqartarnissaq pilersikkumallugu inassuteqaatit pingaarnersiukkat arlaqartut aningaasaqarnikkut ingerlatsineq pillugu nalunaarusiami 2017-imeersumi takuneqarsinnaapput.

– Nunaqarfinni suliffissaaleqineq illoqarfinni suliffissaaleqinermit annertunerugajuppoq. Tamatumunnga atatillugu Piitsuussuseq pillugu suliniummi 2010-meersumi tikkuarneqarpoq, nunaqarfinni innuttaasut ilarpassuisa tamakkiisumik ilaannakortumilluunniit inuussutigaat pisortanit pilersugaaneq aamma imminut pilersorneq/imminut pilersornikkut inuuniuteqarneq. Sumiiffinni ataasiakkaani suliffissaqarnissamut periarfissat nalinginnaasumik amerlasanngillat, taamatullu atorfiit ilaat ilumut suliffeqarnerunatik tassaanerusarlutik suliffissaaleqinermik toqquinerit.

Nalunaarusiami ataatsimut inerniliunneqarpoq misissueqqittoqassasoq. Innersuussutigineqarpoq Naatsorsueqqissaartarfiup 2016-mi nalunaarusiarisimasaa “Aningaasaatikilliortut” aallaavigalugu Naatsorsueqqissaartarfik suliaqaqqissasoq. Naatsorsueqqissaartarfiup suliaa qallunaat piitsuussuseq pillugu ilisimasortaasa suliarisimassaanit aallaaveqarpoq, nunatsinnullu naleqqussarneqarsimalluni.

Taamaalilluni Naalakkersuisut “piitsuussuseq naligiinnginnerlu” pillugit Inatsisartut tunngaviusumik isummernissaanik naatsorsuuteqanngillat.

Nalunaarusiaq tamakkiisoq uani atuarsinnaavat: http://naalakkersuisut.gl/kl-GL/Naalakkersuisut/Pisut/2018/02/260218-Redegoerelse-om-ulighed-og-fattigdom

 

Aaqqissuisut

Nunarput pillugu sammisaqarfik

%d bloggers like this: