Naalakkersuisut allaffissornermik ingerlatsiinnarnissaminnut kaajallaasitaliortut

Marsip tallimaanni Naalakkersuisut siulittaasuata inatsisartunut qinersisoqarnissaa avammut nalunaarutigaa, qaqugulu qinersisoqassanersoq Inatsisartut immikkut katersuutinneqarnerisigut aalajangerneqassaaq.

Naatsorsuutigineqarpoq apriilip 24-ani qinersineq ingerlanneqassasoq.

Naalakkersuisut allaffissornerinnarmik ingerlataqarlutik ataannarnissaat qulakkeerumallugu, ullumi marsip 18-ani kaajallaasitaq avammut ilisimatitsissutigineqarpoq. Kaajallaasitaq Inatsisartut inatsisaannit 2010-meersumit toqqammaveqarpoq.

Kaajallaasitami ilaatigut aalajangersarneqarpoq, Naalakkersuisut 2018-mut aningaasanut inatsit naapertorlugu suliaminnik ingerlatsiinnassasut, kisianni politikkikkut suliniutissanik nutaanik aallartitsisoqarsinnaanngitsoq. Arlaanilli pinartumik pisoqartillugu naalakkersuisoqarfiit Naalakkersuisut Siulittaasuata Naalakkersuisoqarfianut isummerfigisassanik apuussisinnaapput.

Qinersisitsinissamik ilisimatitsissuteqarnerup kingunerisaanittaaq nunanut allanut nunallu akornanni kattuffinnut pisariaqavinngippat angalasarunnaarniarput, aamma tusagassiuutit saaffiginnissutaat naalakkersuisoqarfinni pisortanut allaffissornerinnakkut akisassanngorlugit ingerlateqqinneqartassapput. Imaappoq suliat saqqummiutereerneqarsimasuinnaat teknikkikkut akineqarsinnaapput, soorluttaaq Inatsisartunut ilaasortat § 37-i naapertorlugu apeqquteqaataat akineqartassanngitsut.

Naggasiutigalugu kaajallaasitami ilisimatitsissutigineqarpoq, Inatsisartut inatsisiliariniagaannut, nalunaarutinut, nassuiaatinut assigisaanullu tusarniaanerit, Naalakkersuisussanik nutaanik toqqaasoqarnissaata tungaanut tunuartinneqartut.

Kaajallaasitaq uani alakkarsinnaavat: http://naalakkersuisut.gl/~/media/Nanuaraq/Files/Vaerktoejer_vejledning/Cirkulaerer/2018/Cirkul%C3%A6re%20om%20Naalakkersuisuts%20virke%20efter%20udskrivelsen%20af%20valg%20til%20Inatsisartut%20KAL.pdf

 

Aaqqissuisut

Nunarput pillugu sammisaqarfik

%d bloggers like this: