Naalakkersuisunut ilaasortat kiffaanngissuseqarlutik qineqqusaarusuttut tunuaqqaartariaqassapput

Naalakkersuisut Siulittaasuat qinersisitsinissamik marsip tallimaanni nalunaaruteqarmat, tamatta eqqarsarunarpugut tassa qinersisitsinissamik suaaruteqartoqartoq. Kisianni taamaanngilaq, aamma Naalakkersuisut Siulittaasuata Naalakkersuisoqarfianit qinersinissap nalunaarutigineqarneranut atatillugu kaajallaasitaq arlalitsigut paasinanngitsuliorpoq.

Inatsisartut Inatsisaat naapertorlugu, Naalakkersuisut Siulittaasuat taamaallaat ingerlaannartumik qinersisitsinissamik nalunaaruteqarsinnaavoq, Inatsisartut Naalakkersuisunut ilaasortamik imaluunniit Naalakkersuisunik tamarmiusunik tatiginnikkunnaarlutik atuukkunnaarsitsisimappata. Tamannali pineqanngilaq, tassami Inatsisartut ataatsimiinngillat aamma Naalakkersuisunut tatiginninngissummik tunniussisoqarsimanngilaq. Taamaattumik ingerlaannartumik qinersisitsinissamik suaaruteqartoqarsinnaanngilaq.

Taamaattumik Naalakkersuisut Siulittaasuata qinersisitsinissamik suaaruteqarnera taamaallaat qinersisitsinissamik kissaateqarnertut tiguneqartussaavoq, aamma Inatsisartut eqqissullutik qaqugu qinersisitsisoqarnissaanik aalajangersaassinnaapput, piumagunillu aamma Naalakkersuisussaminnik nutaanik ivertitsisinnaapput.

Qinersisitsinissamik kissaateqarluni ilisimatitsinerup kingunerisaanik Naalakkersuisut Siulittaasuata Naalakkersuisoqarfia kaajallaasitaliorpoq, tassanilu aalajangersarneqartut ilagaat, “…tusagassiorfinnut saaffiginnissutit naalakkersuisoqarfinni atorfilittanut innersuunneqartassasut, aamma taamaallaat paasissutissat teknikkimut tunngassuteqartut paasissutissalluunniit qinersinissap suaarutigineqarnera sioqqullugu tamanut saqqummiunneqarsimasut, tusagassiortunut tunniunneqarsinnaasut”.

Suli qinersinissaq qaqugukkut pissanersoq ilisimatitsissutigineqanngimmat, kaajallaasitaq atuuffeqanngikkallartutut taasariaqarpoq, aamma allanngortinneqarani atuutsinneqassappat aatsaat Inatsisartut qinersisitsinissamik nalunaaruteqarnerisa – imaappoq Inatsisartut atuukkunnaarnerisa – kingorna kaajallaasitaq Naalakkersuisuugallartunut (taakkuli atorfilittaanut) pituttuilersinnaavoq.

Siusinnerusukkut Nunarput allappoq, ilaatigut Naalakkersuisut akornanni mittarfiliortitsinissanut atsiugassanik ataatsimoorussisoqarsinnaannginnera pissutigalugu Naalakkersuisut Siulittaasuat allatut ajornartumik qinersisitsinissamik nalunaaruteqartariaqarlersimasoq. Taamak inissittoqarsimappat suliniummut taamak akisutigalunilu annertutigisumut uppernassuseqarluni avammut oqariartortoqarsinnaanngilaq, aamma tutsuiginassutsi tamaat sapanginnagu tamanna pisinnaanngilaq.

Kaajallaasitamilu “paasissutissat qinersinissap suaarutigineqarnera sioqqullugu tamanut saqqummiunneqarsimasut taamaallaat ilisimatitsissutigineqarsinnaasut” tassaniissorinarpoq.

Sulilu qinersinissamik suaaruteqartoqarsimanngimmat Naalakkersuisunut ilaasortat allaffissornikkut pituttorneqarsimanatik qineqqusaarusuttut, kingusinnerpaamik qinersisitsinissap inatsisiliuullugu ilisimatitsissutigineqannginnerani tunuartariaqassapput.

Aqagu Inatsisartut qinersisitsinissamik nalunaaruteqarnissaat ilimagineqarpoq, nalunaartoqannginneranilu tamanna pissaaq.

 


Naalakkersuisut Siulittaasuat kaajallaasitaq pillugu apeqquteqarfigisimagaluarparput, allaaserisarlu una naammassilermat suli akissuteqarsimanngilaq. Ilaatigut apererusussimagaluarparput kaajallaasitaq “…apeqqutinik saqqummeriartaarsinnaasunik matooriniarnertut paasisariaqarnersoq, aamma Naalakkersuisut atuukkallartussat eqqarsaatigalugit qineqqusaarnerup nalaani saqqummiutereerneqarsimanngitsunik apeqquteqartoqarpat qanoq iliortoqassanersoq”.

 


Kaajallaasitaq sunaava?

Kaajallaasitaq taamaallaat sulisut pituttuisumik najuqqutassiornissaanut atorneqarsinnaavoq, aamma Namminersorlutik Oqartussat suliassaqarfiinut kisimi atuutsinneqarsinnaavoq. Kaajallaasitaq atorneqarsinnaavoq, oqartussaaffeqarfimmut erseqqissarniaraanni maligassiaq/najoqqutassaq aamma tassunga pituttuilluni atuuttoq. Allataq taamaattoq taamaallaat ilitsersuutitut iluseqarpat “kaajallaasitamik” taaguuserneqassanngilaq, kisianni nalinginnaasutut ilitsersuutitut saqqummersinneqassalluni. Innuttaasut inatsisitigut qanoq inissisimanerannik kaajallaasitaq imaqaqqusaanngilaq.

 

Aaqqissuisut

Nunarput pillugu sammisaqarfik

%d bloggers like this: