Mimi: Tunngaviusumik inatsisiliornermut suleqatigiitta

Inuit Ataqatigiit Tunngaviusumik Inatsisiliornermut Isumalioqatigiissitamut ilaasortaatitaat, Mimi Karlsen, suleqatigiittoqarnissaanik kaammattuivoq.

Taanna oqarpoq Tunngaviusumik Inatsisiliornermut Isumalioqatigiissitaq ersarissumik suliassinneqarsimasoq, tassalu Tunngaviusumik inatsisissamik siunnersuuteqarluni suliaqarnissaminut. Inatsillu aatsaat atulissasoq inuiaat kalaallit taasinermikkut akuersippata.

– Suliaq aatsaat aallartilaarpoq, taanna oqarpoq, nangillunilu:

– Suliaq kalaallit nammineq aallartipparput, danskit nunasiaateqarsimasut isumassarsisimanngimmata tamatumunnga aqqutissiuutissalluta. Uanga isumaga malillugu nuna nunasiaateqarsimasoq tassaasuussagaluarmat nunasiaatigisimasami naalagaaffinngornissaanut ikorfartuillunilu kaammattuillunilu suliamik aallartitsisoq. Taammaanngilarli, uagut nammineq aallartippugut, Mimi Karlsen tusagassiuutinut allagaqarluni ilaatigut oqarpoq.

– Tunngaviusumik inatsisiliorniarnitsinni soorlu danskit politikeriisa tapersersornerulluta, naligisutut illuta suleqatigiumassagaluaraatigut. Kisianni nipi imaattoq apuuttarpaat: meeqqat sullinniarsigit, isumaginninneq aningaasarsiorneq suliarinngilarsi, tamanna suliariniarsiuk.

Mimi Karlsen nangilluni allappoq, Kalaallit Nunaanni ilungersortumik meeqqat atugaat pitsanngorsarniarlugit suliniartoqartoq, aamma imigassamik ikiaroornartumillu atuinerlunnerit ilanngullugit.

– Danskit politikeriinut oqaatigiumavara ilungersorluta inuit, meeqqat allallu atugaat pitsanngorsarniarlugit suliuaratta. Taassumalu saniatigut tunngaviusumik inatsimmik sanalluta.

– Danskit politikerii oqallinnermut tikilluaqquakka. Oqallinnerli naligiippasissumik aallaaveqarli. Oqaalullutalu, sunillu suliaqassanersugut uparuartorutsigut nunasiaateqarsimanermi misigisat utersaartarput. Naligiilluta, oqaluttuarisaanerput akueralugu, siunissaq pillugu suleqatigiitta, Inuiat ataqatigiit Inatsisartunut ilaasortaatitaat, Mimi Karlsen oqarpoq.

Aaqqissuisut

Nunarput pillugu sammisaqarfik

%d bloggers like this: