#METOO-p ukiuani Arnat Ulluat nalliuppoq

2018-mi naligiinneq pillugu nunarsuaq tamakkerlugu sumummita killittoqarsimava. Siuariartoqarsimava, imaluunniit qanoq. Nunarsuaq tamakkerlugu Arnat Ulluat anguneqarsimasut iliuuserineqartariaqartullu pillugit oqalliffiullunilu iliuuseqarfiusarpoq.

Nunat allat assigalugit nunatsinni arnarpassuit assigiinngitsutigut katersuullutik ulloq nalliussisarpaat, nunarsuulli sinnerani allatut sakkortunerusumik inissisimasoqartoq nalunanngilaq.

SUBTXT_fake_content
Arnat Ulluanni nunatsinni pisoqartitsisussanut ilaapput Sisimiuni Taseralik, Nuummi Katuaq, Narsami Arnat Peqatigiiffiat aamma Ilulissani Butik 56-i.

Naalagaaffiit Peqatigiiffiata ataani Ilinniartitaaneq, Ilisimatusarneq Kulturilu pillugit suliaqarfik (UNESCO) naapertorlugu, nunarsuarmi nunat assigiinngitsut 40 procentit missaasa niviarsiaqqat nukappiaqqallu assigiimmik periarfissaqartinneqarnissaat annerusumik soqutigisarinngilaat. Nunani tamakkunani niviarsiaqqat affai sinnerlugit meeqqat atuarfianni atuanngillat, aamma inuunerup sinnerani ilinniagaqaqqinnissamut periarfissat annikitsuararsuupput. Nunarsuarmi atuarsinnaanngitsut 774 millionit akornanni arnat amerlanerpaallutik (2/3) inissisimapput.

Niviarsiaqqat 15 millionit ukiut tamaasa suli inersimasunngorsimanatik katitinneqartarput, meeraanerat aserorneqartarpoq, kiffaanngissusiiagaasarput aamma periarfissaanik arsaartorneqartarput. Suliniaqatigiiffik Unchained naapertorlugu, niviarsiaqqat suli 18-liisimatinnagit katitinneqartartut affaasa missaat meeqqat atuarfiannit soraarummeertanngillat.

Nunarsuaq tamakkerlugu peqqinnissamut suliniaqatigiiffik, WHO, missingersuivoq, arnat pingasuugaanngata ataaseq nakuuserfigineqarnermik kinguaassiuutitigulluunniit pinngitsaalineqarnermik misigisaqartartoq. Aallarussaanissaminnuttaaq navianartorsiornerusarput, aamma Naalagaaffiit Peqatigiit naapertorlugit inunnik anngiortumik aallarussisarnerit 71 procentii niviarsiaqqanut/arnanut tunngassuteqartarput. Aallarussat katittussanngorlugit akiginiarneqartarput, imaluunniit atortittartutut niuerutigineqartarlutik.

The World Economic Forum (WEF) naapertorlugu, nunarsuarmi arnaaneq ajornartorsiornarsiartuinnarpoq. WEF-ip 2006-mili pineqartoq sammilersimavaa, 2017-milu nalunaarusiarineqarsimasumi allapput, naligiinneq kinguariartorfiusoq. Nalunaarusiami sammineqarput aningaasarsiorneq, suliffiit, ilinniagaqarsimaneq, politikkimi akuuneq aamma peqqissuseq.

– 2017-mi naligiissitaanerup kinguariartorsimanissaa nalaattussaanngikkaluarparput. Suiaassutsikkut naligiinneq tassaasussaavoq ileqqorissaarnikkut aningaasarsiornikkullu inatsiniutaasussaq, WEF-imi ilinniartitaanermut, suiaassuseqarnermut suliffissaqarnermullu sammisaqarfimmi pisortaq, Saadia Zahidi, nalunaarusiap saqqummersinneqarnerani oqarpoq.

 

Aaqqissuisut

Nunarput pillugu sammisaqarfik

%d bloggers like this: