Ningittagarsuut Kvikk. Assi: jn.fo

Kvikk nunatta Kangianiit uterpoq

Savalimmiuni, nunanilumi allani, aalisariutit sumut niusinerat aamma qanoq pisaqartigisimanerat tamanut nalunaarutigineqartarput. Savalimmiuni aalisarneq qanoq ingerlanersoq ilaatigut jn.fo aqqutigalugu malinnaaffigineqarsinnaavoq.

Kingullertigut nunatta Kangiani Savalimmiormiut aalisarsimallutik utillattaartut ilisimatitsissutigineqartarput.

Ningittagarsuut Kvikk nunatta Kangiani aalisareersimalluni Savalimmiuni Kósinimi niusisussanngortoq ippassaammat ilisimatitsissutigineqarpoq. Aalisakkat assigiinngitsut 77 tonsit userai.

Nunatta Kangiani aalisartoq kingulleq, Núpur, qanittukkut tikissangatinneqartoq ilanngullugu nalunaarutigineqarpoq.

Aamma atuaruk: KANUAANA: Malinnaasoqassanngilaq

Nunatsinni aalisarnerup qanoq ingerlanera paasisassarsiorfigiuminaammat, Nunarput siusinnerusukkut tamanna pillugu allaaseqartarsimavoq. Ippassaammallu Naalakkersuisut apereqqinneqarput, qaqugu tamanna allanngortinniarneqarnersoq.

– Upernariaa aalisarneq pillugu Nunarput sammisaqarpoq, ilaatigut paasissutissat, nunani allani nalinginnarmik ilisimatitsissutigineqartartut, pissarsiariuminaannerat sammillugu. Maanna naalakkersuisut atuuttut tamatumunnga allanngortitsissamaarpat, aamma KANUAANA’p ilisimatitsiumannginnera allanngortinniarpaat? Isertuussinissaq inatsisitigut piumasaqaataanngilaq, aamma paasissutissat tamaasa KANUAANA’p pigereerpai, Aalisarnermut Naalakkersuisumut, Erik Jensenimut, Nunarput apeqquteqarpoq.

KANUAANA’p siullermik akissuteqartarnerani “inunnut ataasiakkaanut paasissutissat pillugit inatsit” isertuussissutissatut sakkuginiarneqarpoq.

Aaqqissuisut

Nunarput pillugu sammisaqarfik