Kuno Fencker: Naalagaaffimmit tapiissutit atunnipput

Naalagaaffiup 2017-mi Danmarkimi kommuninut tapiissutai 64,7 milliardinik amerlassuseqarput, taakkulu nunap sinneranut naligiissaarinerunissamut tapiissutitut, imaluunniit oqimaaqatigiissaarinissaq siunertaralugu agguaanneqartarput.

Naak Kuno Fenckerip toqqaannaq nunatsinnut assersuussisoqarsinnaanngitsoq nassuerutigigaluarlugu oqarpoq, naalagaaffiup atuuttup iluani assersuussinissamut atorneqarsinnaalluartut.

– Naligiinnerusumik atugaqarnissaq siunertaralugu Danmarkimi kommunit aningaasatigut periarfissaat assigiinngitsutigut aaqqiivigineqartarput, soorlu akileraarutitigut innuttaasullu qanoq najugaqariaaseqarnerat allallu, tunngaviusumik inuiaqatigiit ataatsimut kivitseqataaffigisassaat naligiissarniarlugit aamma assigiikkannernerusumik inuiaqatigiit ataatsimut sullinneqarsinnaaniassammata, Kuno Fencker oqarpoq.

Tamakku tamarmik “naalagaaffeqatigiit” iluanni aaqqiissutaasutut isigineqartarput. Naalagaaffiuttaaq isumagisarai qitiusumik mittarfiit, talittarfiit allarpassuillu ataqatigiissaarinermut nunamilu atortulersuinermut tunngassuteqartut.

– Nunatsinni naalagaaffiup tapiissutai annermik allaffissornermut, isumaginninnermut peqqinnissaqarfimmullu atorneqartarput, taakkulu 3,7 milliardit missaat naalagaaffeqatigiinnerup aqqani ukiut tamaasa Kalaallit Nunaannut ingerlatinneqartarput. Allaamigooq massakkut Namminersorlutik Oqartussat qaammammusisalersimapput, qanga kvartalikkaartumik tunniunneqartaraluartut, Kuno Fencker oqarpoq.

– Isumaqarpunga kukkunerusoq eqqarsassalluni, naalagaaffiup tapiissutai annermik allaffissornerup aqqani atorneqassasut. Tassami taamaassimappat, taava naak naalagaaffiup nunap ataqatigiinnissaanut aningaasaliissutai? Uagununa tapiissutit kukkulluinnartumik siunertaqartillugit atorivut, imaluunniit qulaatigut nunap atortulersornissaanut assigisaanullu aningaasaliissutissaagaluit amigartunuku, Kuno Fencker aperivoq.

– Suut tamarmik piiaraanni, aningaasat tunniunneqartartut qitiusumik ingerlatsinissanut naammaqqajaannartarput. Tassami akisoorujussuarmik allaffissornikkut nunatsinni aaqqissuussisimavugut, aamma tamanna pissutigalugu Inatsisartut ineriartortitsinissamulluunniit anersaartorfissaqanngillat, Kuno Fencker oqarpoq.

Taanna naggataatigut oqarpoq, nammineq naalagaaffinngornissaq tapersersorini, kisianni tamanna naalagaaffeqatigiit iluanni – imminut ataqqineq pingaartissimagaanni – pisussaaffilersoqatigiinnikkut ingerlanneqarsinnaalluartoq.

Aaqqissuisut

Nunarput pillugu sammisaqarfik

%d bloggers like this: