Kulturerput ipilerpoq

Ulluni kingullerni inuit attaveqaqatigiittarfianni, soorlu Facebookimi, kalaaliminernik nioqquteqartarneq eqqartorneqarpoq, eqqartuinerlu aallartippoq Namminersorlutik Oqartussat ilisimatitsimmata, tamanna inerteqqutaasoq.

Maanna nunatsinni igasullammattut ilisarisimaneqartoq, Inunnguaq Hegelund, oqallinnermut qisuariaateqarpoq, oqarluni inatsisit nunanut allanut naleqqussarneqarsimasut apeqqusersornagit atuuttussaatinneqarneri maannga killeqartariaqartoq, uagullu nammineq ileqqutsinnut tulluarsaaneq aallartinneqartariaqartoq.

– Soorunami nerisassat isumannaatsuunissaanut aalajangersakkat tunngaviusumik apeqqusersunngilakka, kisianni uagut nerisassanik atuinitsinnut tunngatillugu qangarsuarli ileqqorisimasavut naleqqussarfigineqassapput. Massakkummi pissutsit malillugit soriarsinnaannginnerput annertusarneqarpoq, Inunnguaq Hegelund oqarpoq.

Taanna isumaqarpoq, nunani allani suliffissuarni nerisassiat kisimik nunatsinni isumalluutigineqarsinnaanngitsut, uagullu nammineq pisarisartakkavut atorluarnerulissagutsigit allatut aaqqissuussineq aallartinneqartariaqartoq.

– Inatsisit kalaalimerngit atorluarneqarnissaanut akornusersuisunngorsimappata, taava nunatsinnut tulluarsarneqassapput. Uagut nerisassaatigut illersornerisariaqarpavut, aamma nammineq nunatsinni, Hegelund oqarpoq.

– Nunat allat assingusumik kiinnersillutik ileqqutoqqaminnut naleqqussaasarsimapput, soorlu Islandimi taamak iliorsimasut iliortullu. Nammineerluni pisat suliarinissaanut ineriartortinnissaanullu aqqutissiuisimapput, aamma tamanna suliffissualiunngikkaluarluni pisinnaasimavoq. Qangali ilitsoqqussaralugit nerisassiat niuertarfinni nalinginnarmik pisiarineqarsinnaasarput, uagulli pisiniarfinniluunniit pisanik pisisinnaanngilagut, Inunnguaq Hegelund oqarpoq.

Taassuma qularutiginngilaa inuit namminneq panertitaat – nerisartakkavut – uumasut nakorsaanit misissorneqartuuppata, tamaasa itigartitsissutigisimassagaluarai.

– Eqqiluissaarnissamut ileqqoreqqusat suliffissuaqarfinnut naleqqussarneqaannaratik nunatsinnut inuisalu periarfissaanut aamma naleqqussarneqassapput. Uagut allarluinnarmik kultureqarlutalu nunami issittumik atugassaqartitaavugut. Qanorluunniit ilungersoraluaraanni pinngortitaq tamaat ungaluneqarsinnaanngilaq, Hegelund oqarpoq.

– Siuaasatsinnit ilinniarsimasat ingerlateqqinneqassappata iliuuseqartariaqalerput, Inunnguaq Hegelund naggasiivoq.