Assiliisoq: RG

Kullorsuaq aamma Nuussuaq tunisassiorluartut

Arctic Fish Greenland A/S-p Kullorsuarmi Nuussuarmilu tunitsivii sulisussaaleqingaarnatik tunisassiorsuaartut, Royal Greenland ilisimatitsivoq.

– Tunisassiorneq ima ingerlalluartigaaq allaat containerinik qerititsivilersuineq malinnaarpiarsinnaani, RG ilisimatitsivoq. Piginneqatigiiffik Arctic Fish Greenland, RG-mit 70 %-imik piginneqataaffigineqarpoq.

– Kullorsuarmi tunitsivik containerinik qerititsivinnik qulinik ukioq manna pilerneqarpoq. Tunisassiorneq ingerlalluangaarmat soorlu pileqqinneqarneq malunnarsimanngitsoq. Taamaammat sisamanik tapertassaannik maanna ilaqqippagut. Uanga nammineq aalajangiisinnaasuuguma ilaqqikkusussinnaagaluarpakka, kisianni nunaminertat periarfissaasinnaasut amigalerallaramik, Frederik Olsen oqarpoq. Taanna Kullorsuarmi Nuussuarmilu tunitsivinni ulluinnarni aqutsisuuvoq.

Arctic Fish Greenland 2017-imi juulimi pilersinneqarpoq. Aalisartut 96-it aamma sulisut qulit piginneqataapput.

Tulaassuineq piffissap ilaani ulapaarfiusaqimmat, piginneqataasut aalajangersimapput, tulaassuineq pilersaarusiukkamik ingerlanneqassasoq.

– Aalisartut 20-it ataasinngornermi tulaassisarput, allat marlunngornermi tulaassisarput ilaalu ilanngullugit. Tulaassuinermi pilersaarut pitsaasorujussuuvoq, imalu iluarineqartigaaq allaat ukiumut atorneqarnissaa aalajangiunneqarluni, Frederik Olsen unnersiorpoq nangillunilu:

– Tulaassuinermut pilersaaruteqartitsineq allanut angummaffiusanngitsunut innersuukkusunnarpoq, kingunera pitsaaqimmat. Qaleralinnik annaasaqanngivilluta ingerlavugut. Tulaassuinermi pilersaarusiortalerneq aalisartullu ataatsimut aalajangersagarigatsigu naammagittaalliutaasinnaasunik ukioq tamaat tusanngilagut. Aalisartunullu nalunaarutissaqaraangatta aalisartut ataatsikkut sms atorlugu kalerrittarpavut, taamaammallu qanga nivinngaalluni ilisimatitsisarneq Kullorsuarmi Nuussuarmilu atorunnaalerpoq, Frederik Olsen oqarpoq.

Nuussuarmi Kullorsuarmilu tunitsiviit tamarmik qulit missaannik sulisoqarput.

Aaqqissuisut

Nunarput pillugu sammisaqarfik