Kujallermiit avannamut itivillugu

Angalasussat ukioq ataaseq atorlugu 5.169 kilometerit atorlugit itivinniarnissartik piareersarpaat. Qalasersuaq kujalleq angallavigereerlugu nunarsuup avannarpiaani angalasussanngorput. Ajornartorsiuteqanngitsuunngillallu.

– Sermersuup sikuata allanngoriartortuarnera pissutigalugu Qalasersuup tungaanut angalanissaq naatsorsoruminaappoq,  aamma nalorninartorujussuuvoq, Scott Brady, Outsideonlinemut oqarpoq. Taanna “Expeditions 7”-imut siulersortaasunut ilaavoq.

Peqatini ilagalugit ukiuni qulini kingullerni Toyota Land Cruiserit atorlugit nunavissuit arfineq-marluk ikaarsimavai, aqqutiginiakkallu imaannaanngitsut atortarsimallugit. Kisianni Qalasersuarmut anngunniarneq immikkut unamminarsimavoq, tassami siku aattorujussuuvoq.

– Biilit arlaasa annaanissaat ilimanarluinnarsimavoq, taamalu qalasersuaq tikissinnaajunnaassagipput, Brady oqarpoq.

Angalasussat sermersuaq avannamut ikaartussaavaat, taamalu ikaarsineq siusinnerusukkut misilinneqarsimanngilaq. Sermersuaq kilometererpassuit atorlugit angallavigisussaavaat, aqqutigineqartussarlu ilisimanngisanik ulikkaarpoq.

Aamma atuaruk: Sermersuaq biilinik

Aqqutigineqarsinnaasunik piukkunnarnersiuinerit ukiut arlallit ingerlassimavaat. Satellitit atorlugit sermersuup qanoq “ingerlaarnera” misissoqqissarsimavaat. Angallavissartik isumannaannerpaasussaq 5.169 kilometerinik isorartutigisoq sukumiisumik piareersarsimavaat; Isortumiit Wulffip Nunaannut, tassanngaanniillu Kangerlussuaq aqqusaarlugu Sisimiunut.

Angalaqatigiit ernumaginerpaasimasaat tassaasimavoq sermersuarmut qaqeqqaarniarnissaq.

– Sermersuup sinaa allanngorartuartuuvoq , taamalu naatsorsoruminaalluni, Brady oqarpoq.

Biilit allallu quppanut nakkangajattarsimapput. Aamma tatsimut qerisimasumut biilit ilaat nakkarmat qaqissinnaasimavaat.

– Atugassarititaasut ilimagisamut ajornerusimaqaat. Siku anorimit pitarneqarsimasarluni napasuliatut pissuseqartarpoq, tamakkulu biilinik assut angallavigiuminaapput. Tamakkuninnga misilittarneqarpugut aamma tunniutiinnangajattarnermik kinguneqartarsimavoq, Brady oqarpoq.

Peqataasut tamarmik immikkut akisussaaffeqarput, sulinerlu 40-t tikillugit issittumi akunnerpassuit atorlugit ingerlanneqartarpoq. Tupermi nerisassiortoqartarpoq, tassanilu 20-30 tiimit nerinermut sinngunnermullu atorlugit uninngasoqariarluni 24-48 tiimit biilinik ingerlasoqartarpoq.

– Unamminarnerpaagunarpoq naammattumik qasuersimasarnissaq. Avatangiiserlu sakkortooq pissutigalugu suliassat suunngitsutut isikkoqaraluartut sorsuanngortarput. Ilavut qerussortarput. Maanna qaammat sinnerlugu qaangiukkaluartoq, suli inussama nuuisa ilaat misigissuseqanngillat, Scott Brady oqaluttuarpoq.

– Uteriarfeerunnissatta tungaanut utimut saattoqassanersoq nalilersortuartarsimavarput. Qeqqanut pigatta aalajangerpugut angalanerput avannamut naammassiniarlugu, Brady oqarpoq.