Kujallermi Højskoli malunnartumik ilinniartoqarnerulersoq

Højskolit pillugit peqqussut ukiortaamiit allanngortinneqarpoq. Kingorna Sulisartut Højskoliani ilinniartartut pingasoriaatingajammik amerlanerulerput.

Højskolertullu amerlinerat ilutigalugu atuagarsortoqarpallaarunnaarluni assassortoqarnerulerpoq. Taamak Kujataamiu Nutaaq allappoq. Nunarput piffinni assigiinngitsuniit tusagassaqartitsinissaq siunertaralugu, Kujataamiu Nutaaq avitseqatigisarniarpaa.

Sulisartut Højskolianni aallartittartut 20-it missaaniittaraluartut manna 60-it missaaniipput, tamannalu iluarisimaarneqarpoq.

– Ajunngilaq, kammalaatitaartorluni nutaanik, Suulut Arqe oqarpoq, taannalu Højskolernissani pisarisaqartillugu misigisimavoq.

– Uninngakataavillunga atuarfissannik ujaasigama, asuli misiliinarlugu maanga qinnuteqaraluarpunga.

Peqqussutip allanngortinneqarneratigut inuusuttuaqqat inuusuttullu amerlanerit ilinniarfinnut aqqutissiuunneqarnissaat anguniagaavoq. Taamaalilluni højskolernissamut inissat amerlineqarput. Ilinniartullu assassonermik sammisaqarnerulerput.

Højskolertullu ilaata ilikkakkani aallaavigalugit qiperukkani akiginiartalissamaarpai.

– Turistit maanga tikittaqigamik umiarsuarlutik, immaqa turistinut akiginiartassavakka, Erno Simonsen oqarpoq.

Højskolimi atuartuutigineqartartut amerlatsinnerat ulloq manna tikillugu iluatsittumik ingerlasoq, Højskolip forstanderia naliliivoq.

– Tassa iluatsilluarpoq – ingerlarsoqaat. Atuartuutitta taamak amerlinerat iluareqaarput, forstanderi Dorthe Bidstrup oqarpoq.

Atuartulli atuagarsortippallaarunnaarlugit assassornikkut suliassanik ilinniartinneqarnerulersimapput.

– Massakkut sullivilersortumik atuartitsinerit ingerlapput. Taava tigussaanerusunik atuartitsineq ingerlapparput, Suulut Arqe oqarpoq.

Tamannalumi ilikkagaqarfiusimavoq.

– Mersorsinnaangorpunga…, Suulut Arqe illaatigaluni oqarpoq.

Atuartuutigineqartut amerlimmata ilinniartitsisut pingasunik ilaneqarlutik massakkut tallimanngorsimapput.

– Ilinniartitsisut imatut annertuumik ulapputissaqarnerulernerannik kinguneqanngilaq. Kisianni sulliviit amerligamik, aamma taamaammat ilinniartitsisut amerlipput, Dorthe Bidstrup oqarpoq.

Atuartut naatitsinermittaaq ilinniartinneqartarput.

– Illuaqqanik naatitsiviliorlutik naatitsisartussaagamik taava naatitsiveeraliornikuupput.

Højskolip kukkukuusivittaarnissaa aamma suliniutigineqarpoq.

-Suliniutigaarput massakkut kukkukuujutitaarnissaq, taavalu aamma anginernik naatitsiviliornissaq. Taava upernariartornerani tamakku atorlugit namminneq naatitsiveeraliorlutik naatitsisussapput. Takuniarlugu tamakkuninnga suliaqarnermi naatitsineq qanoq ingerlanneqartarnersoq. Qanorli angitigisumik højskoli kukkukuusivittaasanersoq suli nalunarallarpoq.

– Kukkukuut qanoq amerlatigisut pissarsiarissanerlugit suli aaliangiunneqanngilaq. Apeqqutaagami nunaminertat qinnuteqaatit akuerineqassanersut, forstanderi Dorthe Bidstrup naggasiivoq.


Kujallermi tusagassaqartitsineq soqutigigukku Kujataamiu Nutaaq uani “angerlarsimaffeqarpoq”: http://kujataamiu.gl/. Tassani sapaatip-akunnera allortarlugu pisut pillugit saqqummersitsisoqartarpoq, taakkulu pdf-nngorlugit aaneqarsinnaapput.

Aaqqissuisut

Nunarput pillugu sammisaqarfik

%d bloggers like this: