Kujallermi aqqusineq ineriartortitsissaaq

Narsap Qaqortullu akornanni aqqusineq ukiut ikittunnguit atorlugit pilersinneqarsinnaavoq. Taamaalilluni illoqarfiit marluk atassuserneqassapput. Aatsaat nunatsinni nutaaliortoqassaaq. Taamak Siumut sinnerlugu qinigassanngortittoq, Josef Petersen siunnersuuteqarpoq.

– Kujallermi innuttaasunik ataatsimiititsisarnerni sammineqartorujussuaq tassaavoq angallanneq, pingaartumik kiffartuussinissamut isumaqatigiissutip atuuttup ilungersunarluinnassusia nipangiunneqarnianngilaq. Angallassinissamik isumaqatigiissut akuerineqarsinnaanngilaq. Taamaattumik qitiusumit aqutsineq peerlugu ilisimasalinnut, kommuninut, aningaasat isumaqatigiissuteqarnissamut atorneqartussat tunniunneqassapput, taanna oqarpoq.

Josef Petersen isumaqarpoq pisariillisaanissaq siunertaralugu ineriartortitsisoqassasoq, taamaattumillu mittarfiit sanaartorneqartussatut inissinneqarsimasut piviusunngortinneqassasut Siumup inassutigigai, Sisimiuniit Kangerlussuarmut aqqusineq ilanngullugu.

– Illoqarfiit Narsaq Qaqortorlu atassuserneqarnissaanut aqqusineq 16-17 kilometerinik takissusilik pisariaqartinneqarpoq, aamma ikaartarfik 1,5 kilometerit missaanik takissusilik. Ila  qanikkaluassusia, Josef Petersen tusagassiuutinut allakkamini oqarpoq.

– Aqqusinermik pilersitsineq inuussutissarsiutinik aallartitsinissanik periarfissiissaaq. Takornarissanut unnuisarfiit, naatitsiviit il.il. periarfissiissutigineqassapput. Timersortartut, nipilersortartut, isiginnaartitsisartullumi naapikulallutik imminnut ajunngitsumik ineriartornermik aallartitsissapput.

– Takorloorsiuk, ila qanoq nuannertigissava Narsamiit Qaqortumut neriartulaarsinnaaneq. Narsarmiut Qaqortumi ilinniartut aqqutissaaruttartut aammalu maanna angallassinissamik akuerisaanngitsunik angallatinik angallateqisut, pitsaasumik periarfissinneqassagaluartut. Aammattaaq imminut ataqatigiinnermut annertuumik nukittorsaataassasoq.

– Taamaaliornikkut mittarfissaq illoqarfinnut marlunnut atassuserneqassaaq tamatumalu nassatarinngitsoornavianngilaa, ullumikkut kiffartuussinissamik isumaqatigiissut Kujallermi 40 millioninik naleqartoq, annertuumik annikillisaaffigineqarsinnaalissammat. Annikillisaassutillu ilaat nunatta kujaterpiaanut nunaqarfinnullu angallassinikkut pitsaasumik aaqqissuussinernut atorneqarsinnaalissapput, Josef Petersen oqarpoq.

Aaqqissuisut

Nunarput pillugu sammisaqarfik

%d bloggers like this: