Kilitsissiaq tamanit salliusoq apersorneqalerpoq

Facebookip aallartitsisua pisortaalu, Mark Zuckerberg, marlunngorpat apriilip qulingani Amerikami inatsisiliortunit apersorneqartussanngorpoq. Apersuissapput Inatsiseqarnermut Ataatsimiititaliaq aamma Niuernermut, Ilisimatusarnermut Angallannermullu Ataatsimiititaliaq.

Facebookimi atuisut paasissutissaataat atorlugit allanut tuniniaanermik suliffeqarfik aningaasarsiuteqarpoq, piffissamilu kingullermi paasissutissanik taakkuninnga atornerluisimasutut suliffeqarfik alla, Cambridge Analytica, pasillerneqarpoq – paasissutissallu taakku inunnut 80 millioninut tunngassuteqartut atorlugit politikkikkut sunniiniarsimaneragaavoq.

Kisianni paasissutissat tamakkorpiaat atorlugit facebooki nammineq inuussutissarsiuteqarpoq, aamma isornartorsiuisut oqarput, Cambridge Analyticap iliuuseqarnera facebookip iliuuseqartarneranut allaannerussuteqanngitsoq.

Mark Zuckerbergi sivisuumik inatsisiliortunit apersorneqarumasarsimanngilaq, maannakkulli avaqqunneqarsinnaajunnaarpoq.

– Tusarniaaneq pingaaruteqarpoq, tassami inuit paasissutissaataasa qanoq atorneqartarnerannut tunngassuteqartut qaqileriffigineqarsinnaapput, Ataatsimiititaliat ilisimatitsipput.

Apersorneqarnera isiginnaarumagukku una ornissavat: Senate Committee on the Judiciary, Senate Committee on Commerce, Science, and Transportation.

Aaqqissuisut

Nunarput pillugu sammisaqarfik

%d bloggers like this: