Kiffaanngissuseq sunaagami?

AAQQISSUISUT. Kiffaanngissuseq politikkimut tunngatinneqaraanngami pineqartarpoq qanoq pisoqarpalluunniit inuit allat pissaaneqarumanerannit nammineq inuttut attorneqarsinnaannginneq. Qanorluunniit inissisimasoqaraluarpat inuup ataatsip salliuniarnera inuit allat tunniutiinnarnerannik kinguneqassanngitsoq.

Politikki pillugu eqqarsartarnermi tunngaviusumik illuatungeriit ungasinnerpaaffiat marloqiusamik inissisimatinneqartarpoq, taakkulu marluk imaaliallaannaq akulerussuunneqarsinnaanngillat.

Siulleq tassaavoq politikkikkut eqqarsartaaseq inuup ataatsip periarfissaanik killilersuinngivilluni kiffaanngissuseqartitsisoq aamma akiani tassaavoq aningaasarsiornikkut allatigullu naligiittoqanngippat inuk kiffaanngissuseqalersinnaanngitsoq; inuup kiffaanngissuseqarlernissaa anguniarlugu allat pissaaneqarneroqqunagit killilersorneqassasut.

Tunngaviusumik paasinnittaatsit taakku marluk ‘akuersortunut’ ‘akuersunngitsunullu’ immikkoortinniarneqartarput. ‘Akuersortut’ tassaapput inuit namminneq piginnaaneqarnermik periarfissaqarnermillu pigisaqarneranik pingaartitsisut, ‘akuersunngitsullu’ naqisimaneqarani kiffaanngissuseqarnissamik pingaartitsisut.

Akuersorluni kiffaanngissuseqarneq paasineqarajuttarpoq tassaasoq ilinniagaqarsinnaaneq, sunniuteqarsinnaaneq, naammattumik peqarneq imminullu aqussinnaaneq, imaappoq namminerisamik pigineqartut. Akuersunngitsumik kiffaanngissuseqarneq paasineqarajuttarpoq tassaasoq allanit pinngitsaalineqannginnissaq, soorlu parnaarussaanissamut, arsaartugaanissamut nakkutigineqarnissamullu sissuerneq / upalungaarsimaneq, imaappoq namminerisamik pigineqanngitsut.

Akuersortumik kiffaanngissuseqarneq ‘socialistinit’ erseqqissarneqarajuttarpoq, akuersunngitsumillu kiffaanngissuseqarneq ‘liberalinit’ erseqqissarneqarajuttarpoq.

Naak eqqarsartariaatsit taakku marluk imaarlugit nassuiarneqarsinnaanngikkaluartut, tunngaviusumik taamak inissisimanerat ilisimatuut akornanni akuerineqakannertarpoq. Tassami inuit ataasiakkaat pineqaleraanngata qalipaaterpassuaqalersinnaasarmat, tamarmik nassuiarlugit imaarneqarsinnaanngitsut. Aaqqissuussisimanerli, imaappoq naalagaaffik, eqqarsaatigissagaanni tunngavii taakkuupput.

Nunarsuarmioqatigiit oqaluttuarisaaneranni paasinnittariaaseq ataaseq kisimiitsillugu atorneqarneqanngilaq.

Russit Nunaanni kommunistit pilermata ‘akuersortumik’ ingerlatsiniarneq sukkasuumik inuit ataasiakkaat sunniuteqarsinnaajunnaarnerannik kinguneqarpoq, imaappoq inuit namminneq aqussinnaannginnerat ilimagalugu pinngitsaaliilluni apersuinanilu aaqqissuussinerpassuit eqqunneqarput, tassami allat nalunngisaqarnerusoralutik inissisimapput.

USA-mi liberalit pilermata ‘akuersunngitsumik’ ingerlatsiniarneq sukkasuumik inuppassuit parnaarussaasarnerannik kinguneqarpoq, aamma nuna taanna innuttaasunik nakkutilliinerpaasutut naatsorsuunneqartarpoq, imaappoq inuit aqussinnaanerat ilimaginagu allat kiffaanngissusiiagaanissaat pinngitsoorniarlugu kiffaanngissusiiaapput.

Nunatsinni qanoq inissisimasoqarnera qissimissagaanni, akuersortumik ingerlatsiniarneq inituneraluni inissisimavoq. Tassalu politikerit ‘socialistiunerarlutik’ imminnut nittarsaattut. Akuersunngitsut ikinnerupput. Tassalu politikerit ‘liberaliunerarlutik’ imminnut nittarsaattut.

Ukiuni kingullerni qulini qinersisartut isummertarnerat agguaqatigiissillugu takussagaanni ima inissisimasoqarpoq:

Socialistiunerartut (Inuit Ataqatigiit, Inuit Partiiat, Kattusseqatigiit Partiiat, Partii Naleraq, Siumut, Sorlaat Partiiat) Liberaliunerartut (Atassut, Demokraatit)
Taaguisut: 23.607 77% Taaguisut: 5.475 23%

Ukiunilu kingullerni nunatsinni malunnarsiartorsimasoq tassaavoq, politikerit amerlanerujartuinnartut aaqqissuisimanermik illersuisunngorsimammata, imaappoq oqariartoraanngamik aqqissuussisimaneq illersulersarmassuk. Taakku amerlasuut akuersortuullutik inissisimaniaraluarput, kisianni namminneq suliarisimasatik pineqaleraanngata akuersortuujunnaartarput.

Uagut tamatta qinersisartutut pisussaaffigaarput tunngaviusumik politikkikkut eqqarsartariaatsit taakku marluk akornanni politikerit qanoq qalipaasersuinerat tusarnaaqqissaasallugu. Assersuutigalugu ‘akuersortumik’ inissisimaniartoqarsinnaanngilaq, illuatungaatigut Naalakkersuisut ataatsimiineranni inuit ataasiakkaat avammut oqaaseqarsimanerat tunngavigalugu qanoq pineqarnissaat eqqartorumasimagaanni.

Aamma taamaakkami qinersisartut oqallitsinneqartarneranni politikerit equllutik qungujussaqartartut takornartaanngillat. Taamak pissusilersortoq takugukku nalussanngilaq illit pillutit atanianngitsoq. Aaqqissuussisimanermit pisarineqarsimavoq.

 

%d bloggers like this: