KANUAANA: Malinnaasoqassanngilaq

Nunatsinni aalisarnerup qanoq ingerlanera malinnaaviginiarlugu taarsiornarpoq. Nunani allani suut tamarmik ammasumik ingerlatsiffiutillugit, nunatsinni suli matoqqasumik ingerlatsisoqarpoq.

Kalaallit Nunaanni Aalisarnermut Akuersissutinik Nakkutilliisoqarfik (KANUAANA) isumaqarpoq ‘inuit ataasiakkaat’ suliffeqarfiillu soqutigisaat pineqarmata paasissutissat tunniunneqarsinnaanngitsut.

Nunarput paaserusussimagaluarpaa, 2018-mut aalisakkat il. il. suliffeqarfinnut pisassiissutigineqartoq qanoq maannamut killiffeqarnersut, ilanngullugit illoqarfinnut sorlernut tulaassuineq qanoq annertutiginersoq ingerlanneqarsimanersoq aamma avammut toqqaannaq nassiunneqartut qanoq annertutiginersut.

Paasisaqarnerunissamut kissaateqarneq pissuteqarpoq, Inatsisartunut qineqqusaarnerup ingerlanerani aalisarneq sammineqaleraangat  eqqoriaanerinnarnik tunngaveqartillugu oqallinneq ingerlanneqalertarmat.

KANUAANAmulli paasiniaagatta ikiortissaqanngilaq. Aperaarput qanoq ililluni pisat, sumi niuneqarsimaneri il. il. malinnaaffigineqarsinnaanersut.

– Inunnut ataasiakkaanut paasissutissat pillugit inatsit – persondatalov – malillugu taamaallaat pisinnaatitsissummik (fuldmagt) peqartunut paasissutissanik apeqqutigisannut tunngasunik tunniussisoqarsinnaavoq, KANUAANA allappoq.

Apereqqikkatsigu ima paasineqassanersoq, suliffeqarfiit pisassinneqarsimasut aatsaat Nunarput pisinnaatitsissummik tunineratigut paasissutissanik pissarsisoqarsinnaanersoq, KANUAANA akeqqinngilaq.

Assersuutitut tunniupparput nunani allani toqqaannaq malinnaatitsineq, aamma aalisariutit / kilisaatit ataasiakkaat pisarisimasaanut sumullu niuneqarsimanerinut tunngassuteqartut. Nammineq alakkaruk:

http://www.fiskistofa.is/english/quotas-and-catches/total-catch-and-quota-status/

KANUAANA 2014-mi kingullermik ataatsimoortumik aalisarneq pillugu nalunaarusiorpoq.

 

 

%d bloggers like this: