Kangianiit Kitaanut suliartulersut

Royal Greenadimi sulisoqarnermut immikkoortortaqarfimmi sulisut sulisinnaasunik oqaloqateqariartorlutik marloriarlutik Tasiilamut angalareerlutik Kitaani Royal Greenlandip tunisassiorfiini 2018-mi ulapaarfimmi sulisisinnaasut 27-it suliffissaannik neqeroorfigisinnaasaatik nanisimavaat.

– Marsimi marloriarluta Tasiilamiinitsinni 2018-mi ulapaarfimmi sulisorilersinnaasavut inuit 50-it immersugassat atorlugit oqaloqatigalugit apersorsimalerpavut. Taakkunannga toqqarneqartut 27-it Royal Greenlandip tunisassiorfiini suliffissaannik neqeroorfigissavagut, Royal Greenlandimi sulisoqarnermut immikkoortortaqargiani pisortaq, Svend Larsen oqarpoq.

Royal Greenlandi ilisimatitsivoq, ulapaarfiup nalaani sulisunut aalajangersimasunik piumasaqaateqartoq, ilaatigut sulilertussat tarnikkut timikkullu tunisassiorfinni sulinissaminnut piareersimanissaat piumasaqaataalluni.

– Tasiilami oqaloqatiginnilluta apersuinitsigut paasiniarsimavarput sulisorilersinnaasavut piumasaqaatitsinnik naammassinninnersut. Taamalillutalu sulilersinnaasutut oqaloqatigineqartut 50-usut akornanni 27-it piumasaqaatitsinnik naammassinnimmata taakku Kitaani tunisassiorfinni amigaateqartoqalerpat suliffimmik neqeroorfigineqassapput, Svend Larsen oqarpoq.

Suliartortussat angalanissaat Namminersorlutik Oqartussat nuttarnerulersitsiniarluni aningaasaaliissutaannik akiliunneqassapput, sumiiffinnilu assigiinngitsuni ineqarnissaat Royal Greenlandip isumagissavaa.

Aaqqissuisut

Nunarput pillugu sammisaqarfik

%d bloggers like this: