Microsoftip Naalakkersuisut tatiginanngitsutut mattusimaqqagai

Namminersorlutik Oqartussat innuttaasunut amerlasuunut attaveqarsinnaajunnaartitaassimapput, taakkulu soorlu akileraaruseriffimmiit kiffartuussivinniillu allanit allagarsisinnaajunnaarsimapput. 

Tamatumunnga pisutaassimavoq Namminersorlutik Oqartussani sulisut ilaata nammineq qarasaasiani atorlugu Namminersorlutik Oqartussat webmailiannut januaari qaammat naalersoq isersimasimammat.

– Qarasaasiaq taanna malwarenik (qarasaasianut atugassiat ajoqusiiniartut, aaqq.) imaqarsimavoq, tamannalu pissutigalugu Namminersorlutik Oqartussanit mailit tusindilippassuit nassiussuunneqarsimallutik. Akunnerit arlaqanngitsut qaangiummata Namminersorlutik Oqartussanit malwaret qarasaasiamit tassannga pisut unitsinneqarput ingerlaannarlu Microsoft attavigineqarpoq ajornartorsiut aaqqinneqarsimasoq nalunaarutigalugu,  IT-mut pisortaq, Tony Ditlevsdal, ilisimatitsivoq.

Ilanngullugulu oqaatigaa innuttaasut ilaat Namminersorlutik Oqartussanut suli attaveqarsinnaanngitsut. Eqqorneqartut tassaapput makkuninnga atuisut: hotmail, livemail aamma Outlook.dk.

– Naak ullut tamaasa Microsoftimut saaffiginnittaraluarluta suli qisuariarfigineqarsimanngilagut. Ajornartorsiut annertuvoq, tassami innuttaasut amerlasuut greennet.gl atorunnaarmalli hotmail-imut nuunnikuummata. Sulimi ajornartorsiut imaaliallaannaq qaangerneqarsinnaarpasinngilaq, tassami  Namminersorlutik Oqartussat ullut tamaasa Microsofti saaffigisaraluarlugu suli akissutisisoqanngilaq, Tony Ditlevsdal oqarpoq.

Aaqqissuisut

Nunarput pillugu sammisaqarfik

%d bloggers like this: