Kossakovsky filmiliortoq. Assiliisoq: www.stineheilmann.dk

Kalaallit filmiliaat Venedigimut

Ánorâk Filmip filmi pisimasuinnik tunngavilik “Aquarela” suleqataaffigisimavaa, filmilu taanna Venedigimi festivalimut peqataasussatut tiguneqarsimavoq. Festivali taanna ukioq manna 75-iliilluni nalliuttorsiussaaq, aamma kalaallit filmiliaat perngaammik peqataatinneqassaaq. Festivali aggustip 29-nit sitsip 8-nut ingerlassaaq.

Filmiliortut oqarput, Venedig immami illoqarfittut Aquarela’mut tulluunnerusinnaanngitsoq. Filmimi sammineqarput immap imillu nunarsuatsinnut qanoq pingaaruteqassusii – inuunermi pinngitsoorneqarsinnaanngitsutut aamma sunik tamanik aserorterisinnaasutut.

Russit ilitsersuisartuat, Victor Kossakovsky, nunarsuup ilarujussua sammisaq taanna pillugu angalaffigisimavaa, soorlu Siberiami Baikalip tasersua, Venuzuelami qorlortorsuaq Angels Falls, Portugalip sineriaanni malissuit, Atlantikumi sarfarnersuit, Caribiami anorersuartarnera minnerunngitsumillu Qeqertarsuup Tunuani sermeq.

Nunatsinniit assilisat filmimi tallimararterutitut initupput, filmilu Ánorâk Filmip, Namminersorlutik Oqartussat kulturikkut aningaasaliissutaanit taperneqarluni, sanatitseqataaffigisimavaa.

Aningaasaleeqataasut ilaat, Aimara Reques – Aconite Productionsimeersoq – suleqataasut ilagaat.

– Aquarela ineriartortileratsigu ernummatitta annersarisimavaat Kalaallit Nunaanni immiussinissaq. Taamaattumik sumiiffimmi ilisimannittunik suleqateqarnerput uatsinnut oqilisaataasimaqaaq, aamma inuiaqatigiit sutigut tamatigut tapersersuisimanerat ilanngulluni pingaaruteqarsimaqaaq. Suliaqarnissatsinnut ajunnginnerpaamik atugassaqartinneqarsimavugut, Aimara Reque oqarpoq.

Ánorâk Filmimi qitiulluni inissisimasimavoq Emile Hertling Péronard, taannalu aamma nuannaarutissaqarluni oqarpoq.

– Uatsinnut annertuumik ilikkagaqarnarsimavoq, pingaartumik filmiliullammak Kossakovskytut ittoq suleqatigisinnaasimagatsigu pingaaruteqartutut isigaarput. Suliap ingerlanerani pikkorinnerulernissatsinnut periarfississimavaatigut, aamma ilorraallannartumik nunarsuarmi takutitsiviit annersaanni peqataasussanngornerput tulluusimaarutigeqaarput, Emile Hertling Péronard oqarpoq.

– Aquarelap inernera kusanarluinnarpoq, pissanganarpoq aamma filmiuvoq eqqarsalersitsisoq, Kalaallit Nunaannilu takutinnissaa qilanaarilereerparput, Péronard oqarpoq.

Ánorâk Filmip siusinnerusukkut SUMÉ pilersitseqataaffigaat. Nunatsinni Aquarelap qaqugu takutinneqaqqaarnissaa inissinneqangajalersoq, Péronardip ilanngullugu oqaatigaa.

Aaqqissuisut

Nunarput pillugu sammisaqarfik