Kalaallit Airports: Inuiaqatigiit akiliissapput, kisianni oqartussaaffeqassanngillat

EQIKKAANEQ. Suliffeqarfik namminersortoq pineqarsimasuuppat, aningaasaliiniartut qangali qimarratereersimassagaluartut nalunanngilaq. Kalaallit Airports isumaqarpoq, ingerlatsivimmut aningaasaliissut oqartussaaffeqassanngitsut.

Pingaartumik upernariaa Naalakkersuisut suliffeqarfiutaat, Kalaallit Airports, pillugu tusagassiutit aqqutigalugit oqallittoqalaarpoq. Oqallinnerullu ingerlanerani Kalaallit Airports paatsoortoqarsimasinnaaneranik sissuertuulluni utertitsisarluni oqaaseqaateqallattaartarpoq.

Oqallinnerullu ingerlanerani sooq pisortat suliffeqarfiliortarnerannut tunngavilersuutissat imaaginnavipput, tassami anguniarneqartoq tassaavoq inuiaqatigiit akiliissasut, kisianni taakku oqartussaaqataasinnaanerannik killilersorneqassasut. Kalaallit Airportsilumi nammineq allappoq oqartussaasoqassappat, taava aktieselskabiliornissaq pisariaqanngitsoq.

– Namminersortuugattami, Kalaallit Airports isummerpoq.

Upernariaa Ilulissani aamma Nuummi mittarfiit allilerneqarnissaanut atatillugu tusarniaasoqarpoq, tassanilu Kalaallit Airports, taamalu Naalakkersuisut, qanoq imminut paasinnittariaaseqarnerat erseqqinnerulerpoq, aamma taamaallaat immaqa Qaqortumi mittarfissaq sanaartorneqarumaartoq.

Suullu Kalaallit Airportsip immikkut erseqqissarsimanerai takulaariartigik:

– Naalakkersuisut namminneq malittarisassaani allassimareerpoq suliffeqarfimmut toqqaannaq akuleruttoqarsinnaasanngitsoq. Namminersorlutik Oqartussat aktieselskabiliorlutik ingerlatserusulersimagaangamik anguniarneqartartoq tassaavoq, suliffeqarfimmi siulersuisut aqutsisullu pisariaqartutigut namminneq aalajangersaasassasut. Politikerit (inuiaqatigiit aningaasaliisimasut) akulerunniarunik, tamanna siulersuisut qinerneqarnerat aqqutigalugu pissaaq. – Politikerit ulluinnarni ingerlatsinermut toqqaannaq akulerunniarunik, taava aktieselskabitut aaqqissuussineq atorneqarsinnaanngilaq. Tassami suliffeqarfimmi siulersuisut aqutsisullu naalagaapput.

– Kalaallit Airportsip kissaatigaa, Ilulissani aamma Nuummi mittarfiit immikkut ingerlanneqassasut, taakku attartornikkut niuerneq aqqutigalugu akilersinnaasumik ingerlanneqarsinnaassangatinneqarmata. Qaqortoq niuerneq aqqutigalugu ingerlanneqarsinnaanngimmat sanaartorneqareerpat allamut ingerlatassanngortinneqarsinnaassaaq. Qaqortumi mittarfik amigartoorfiulluni ingerlasussaq Kalaallit Airportsip ingerlatissappagu, taava suliffeqarfiup aningaasanik atorniarumalluni tatiginassusianut nakkarsaatsitut inissisimalissaaq, taamalu mittarfiit allilerneqartussat marluk akitsorsassallugit.

– Sanaartorfiusussat mingutsinneqarsimappata tamanna Kalaalit Airportsip akisussaaffigissanngilaa, tassami suliffeqarfiup nammineq tamakku pilersitarisimanngilai, aamma naak mingutsitsisimasussaq tassaasoq piginnittoq (Naalakkersuisut aqqutigalugit Mittarfeqarfiit, aaqq.). Kalaallit Airports nammineq allappoq, tamakkuninnga peqassappat sanaartornissaq akisunerujussuanngussasoq.

– Mittarfiit tungaanut aqquserngit piginnittup isumagissavai, aamma Kalaallit Airportsimut atatinnagit, imaappoq Qaqortumi aqqusinissap naammassinissaa kommunimi innuttaasunut miloriunneqarpoq.