Julian Assangep illersugaanera unilerunartoq

WikiLeaksip tunngavileeqataasua, Australiamiu Julian Assange, 2012-mili Londonimi Equadorip aallartitaqarfiani qimaasutut inuusimavoq.

Taamak paasiniaasarluni tusagassiortartoq, Glenn Greenwald tusagassiorfimmini, The Interceptimi nalunaaruteqarpoq. Taanna siusinnerusukkut The Guardianimi tusagassiortutut sulisimavoq, annermik naalagaaffiit isumannaatsuunissamut iliuuseqartarnerat pillugit allaaseqartartoq, soorlu isertorluni inunnik alapernaarsuinerit pillugit.

Taanna naapertorlugu Equadorip præsidentia, Lenín Moreno, tallimanngormat Tuluit Nunaannut angalasimavoq. Ilisigineqarpoq angalaneranut siunertaasoq, Julian Assangep Equadorip aallartitaqarfiani illersugaanera atorunnaarsinneqassasoq, taammalu Equadorip aallartitaqarfianiit anisitaassasoq.

Julian Assange 2012-mi Londonimi Equadorip aallartitaqarfianut iserpoq, tassani qimaasutut imminut nalunaarutigaluni. Tamanna pivoq, pinngitsaaliilluni arnerisimaneragaanerata kingorna, Svenskit tigusarineqarnissaa piumasarimmassuk.

Naak Svenskit tigusarineqarnissaanik piumasaqaatiminnik kingorna tunuartitsisimagaluartut, Assangep aallartitaqarfik qimakkusunngilaa. Ersissutigisaa tassaavoq, Afghanistanimi Irakimilu sorsunneq pillugu WikiLeaks aqqutigalugu paasissutissanik avammut siammarterisimasutut unnerluunneqarluni USA-miit tigusarineqarnissani, kingornalu USA-mi eqqartuunneqartussatut tunniunneqarnissani.

Aaqqissuisut

Nunarput pillugu sammisaqarfik