Isumaqassappat qinersinermi partiit pineqanngillat

AAQQISSUISUT. Partiit tamarmik assingusumik oqariartuuteqarput, tassami kiap oqariartuutsit makku akerlerissagamigit:

Kikkut tamarmik peqataatinneqassapput; Maani nunallit salliutinneqassapput; Sapinngilagut; Ineriartorneq aallarnissaaq aamma sineriammut siammarneqassaaq; Inuit kiffaanngissuseqarnerulissapput; Ilinniagaqassaagut; Qitiusumit aqutsineq unitsinneqassaaq; Inuit namminneq pilersitsinissaminnik periarfissinneqassapput; Pisinnaasut sulissapput; Pisortat sutigut tamatigut ingerlatsinerat annikinnerulissaaq; Tamatta atorfissaqartinneqarpugut ilaalu ilanngullugit. Atuaqqilaariakkit. Taamaattussaaginnanngikkaluarpa?

Qineqqusaartut akornanni silaqarluanngitsoqaranilu sakkortuumik isummersortoqanngilaq. Oqariartuutsit tamarmik tunngaviusumik ataatsimoortitsiniarnermik siunertaqartillugit oqariartuutsigineqartarput, aamma pisarneq naapertorlugu oqaatsivut eqqartorneqarmata, siunertaasoq tassaavoq peqataatitsinissaq – oqaatsivut aqqutigalugit. Taakku pingaarnerullutik inissisimasut. (Kisianni – oqaaseq taanna ilaanngitsoorneq ajormat – isumaqassanngitsoq “mattutissasugut”, soorlumiuna kalaallisut oqaasillit inuusut mattusimasut.)

Tamarmik illit qinersiartuleruit akorsiniutigaatsit. Tassami partiit tamarmik tunngaviusumik akullersiorniartuupput – tamarmik “talerpilliit” “saamerliillu” akornanniittutut pissuseqarput. Ingasannerpaanik inissisimaffigineqarsinnaasut pineqanngillat;

Pisortat suliffeqarfinnik ingerlatsissanngillat imaluunniit suut tamarmik pisortanit ingerlanneqassapput. Soorlu Demokraatit erseqqinnersaallutik “tungujortuunermik” suaaruteqartut, ilutigisaanik oqanngillat, suliffeqarfiit pisortat pigisaat matuneqarlutik namminersortunit ingerlanneqalissasut. Allannguisoqassappallu qularnanngilaq pineqassaaq, allat periarfissinneqassasut, kisianni pisortat suli unammillertigalugit.

Imaluunniit;

Inuit inuunerat pisortat naalakkersussavaat imaluunniit inuit inuunertik namminneq akisussaaffigaat. Soorlu Partii Naleraq erseqqinnersaallutik Naalagaaffinngornissamik suliniuteqartut oqanngillat, tamanna qitiusumik oqartussat isumalluutigalugit piviusunngortinneqassasoq, aamma naak partii “aappalunnernut” inissinneqarsinnaalluarunaraluartoq. Oqarput inuk namminersulissammat nuna namminersulissasoq.

Sumiiffinni ataasiakkaani qineqqusaartut (tv-kkut aallakaatinneqanngitsuni) sumiiffitsik pillugu sakkortuusattumik isummersortarput. Tamanna ajunngilaq. Qaniginerisavut oqaluukkaanni qanoq isumaqavinneq saqqummeqqajaanerusarpoq. Qineqqusaarnernilu taakkunani qujanartumik peqataasut namminneq internetikkut aallakaatittagaanni, partiit assigiinngissutaat erseqqinnerulersutut isikkoqalertaraluarput. Soorlu Paamiuni qineqqusaartoqarmat Siumut, Europami qanganitsanik pingaartitsisunut, konservativinut, unammillerluarsinnaasoq.

Nuna tamakkerlugu tv-kkut qineqqusaarnermi mianersornerusunnguamik ingerlatsisoqarpoq, aamma – aalisarneq eqqaasanngikkaanni – aaqqissuuseqqittariaqarnerit itisilernaveersaarneqarput, tassami nuannarineqarnavianngillat. Assersuutigalugu allaffissornerup annertunerujussua pineqarmat annikillisaasoqarnissaa arlalinnit eqqartorneqarpoq, kisianni qanoq sumilu tamanna pissanersoq tikinnaveersaartarlugu.

Aalisarnerlu oqallisigineqarmat pinngitsoqaratik tamarmik sattapput, pingaartumik nalillit annissuuneqartut oqariartuutiginiarneranni tunngavilersuisinnaanngikkaangata malinnaassuulluni ilungersornartarpoq. Tassami politikikkut suliallit qangali ileqquliussimasaat ulloq manna tikillugu atorneqarpoq: Nalingi pillugit ilisimasaqanngivipput. Aamma oqallisigisaq pillugu – nunatta aningaasatigut isaatsitsissutituaa – sakkussaqarfiginngivippaat. Suli ilisimasaqarnerulernissaq inatsisitigut sakkulersuutigineqarsimanngilaq, aamma Naatsorsueqqissaartarfik ilanngulluni naleqassutsit pineqaraangata eqqoriaanernik tunngaveqarluni ingerlatsivoq.

Pineqartut tamarmik kattullugit annerusumik minnerusumilluunniit siunnerfeqarput.

Apeqqutaalluni qanoq paasinnittariaaseqarneq pitsaanerulinngilaq, partiit Naalagaaffinngornissamik oqariartuuteqartut naggataatigut sakkukinnerulermata, aamma aallaqqaammut ilungersornerpaasimasut akornanni anguniagaq immini alloriarfiginissaa annerusumik tunngavilersorunnaarlugu “taasisitsinissamut” sangutinneqarmat.

Taamaattoq naalagaaffinngornissaq tamanit isumaqatigiissutaavoq. Apeqqusersorneqartoq tassaavoq qanoq sukkatigisumik tamanna pissanersoq. Aamma utaqqivallaarluni qaqugu inortuisoqassanersoq oqaatiginngiinnarneqartartoq malunnarpoq. Naggataatigut umiarsuup qaqugu aallarnissaa inissinneqarsinnaajunnaarpoq.

Taamaattumik ullumi qinersineq tunngaviusunik politikikkut sumi inissisimaveqartissallugu pingaarnerunnginnguatsiarpoq.

Tunngaviusumik apeqqutaanerusoq tassaavoq: Kina upperineruiuk?

Ullumi upperinersannik qinersilluarna.