Joanasie Akumalik, Iqalunni kommunalbestyrelsimut ilaasortaq. Taanna imissaaleqilersinnaanermut apeqqummik qaqitsivoq. Assiliisoq: CBC North

Iqalunni imeq amigaataalersoq

Ukiunnginnerani imissaqarnissaq eqqanaarniarneqalerpoq, tamannalu atuinerulersimanermik aamma ilutigisaanik siallinnginnerusimanermik pissuteqartoq oqaatigineqarpoq. Imissaaleqilersinnaaneq 2005-imili ilisimaneqarsimavoq.

Illoqarfimmi ingerlatsisut oqarpoq, imissaaleqilersinnaaneq 2005-imilli naluneqarsimanngikkaluartoq, kisianni aatsaat kommunalbestyrelsimut ilaasortaq,  Joanasie Akumalik apeqqummik qaqitsimmat, pimoorussamik suliniartoqarluni aallartittoqarsimasoq.

– Imissaaleqilersinnaaneq paasisaqarfiginerussallugu maanna illoqarfik iliuuseqarluni aallartissimavoq. Anguniarneqarpoq taseq imeqarfittut atorneqartoq oktobari aallartinnginnerani naammattumik immerneqarsimassasoq, borgmesteri Madeleine Redfern Nunatsiaq Newsimut oqarpoq.

CBC North allappoq, imissaaleqineq atorneqalereersimasoq, aamma immiorfiup imermik pilersorneqarnera unitsinneqarallarsimasoq.

Iqalunni imeqarfik aasaanerani siallertarneratigut immeqqinneqartartussatut naatsorsuussaavoq, aamma nalinginnarmik oktobarimi ulikkaaqqissimasarpoq. Kisianni 2017-imi tamanna pisimanngilaq, aamma siumut ilimasaarutit oqarput, siallertarnera annikinnerulersinnaasoq. Ukioq manna februaarimiit juunip tungaanut ukiut aqqanillit ingerlaneranni aatsaat taamak sialukitsigisimavoq.

Tasermi imeq maanna issimasuutigineqartoq ukiumut ataatsimut naammattussatut naatsorsorneqarsimavoq. Maannalu imeqarfiusinnaasut allat siusinnerusukkut misissorneqartarsimasut misissoqqillugit aallartitsisoqarsimavoq.

Aaqqissuisut

Nunarput pillugu sammisaqarfik