Inuusuttut assigiimmik ikiorserneqassapput

Inuusuttut amerlavallaat meeqqat atuarfiat kisiat naammassisimasarpaat. Sooq ingerlaqqittannginnerat eqqumaffigineqanngippallaarpoq. Siumut sinnerlugu Inatsisartunut qinigassanngortittoq, Steve Sandgreen, ilaatigut taamak oqarpoq.

Taanna oqarpoq, inuit amerlasoorpassuit meeraallutik inuusuttuullutilluunniit inuunerminni ikilerneqartartut aamma tamakku ullutsinni eqqumaffigineqanngippallaartut.

– Inuusuttut amerlasuut uippakajaarnermik, isumatsassimangaarnermik annilaanganermillu eqqorneqartartut. Aamma taamaakkami inuusuttullu katataasarput, sulilu amerlavallaat inuunerminnik kipititsinissaminnut ingerlasarput.

– Naluneqanngilaq meeqqat atuarfianiit ingerlaqqittartut periarfissaqarnerusartut, aamma ikiorneqarnissamut. Inuusuttulli ilinniarfinnut ingerlaqqissimanngitsut periarfissaqanngillat.

– Inuusuttut ilinniarnissaminnut ingerlaqqissimanngitsut siunnersorneqarnissamik pisariaqartitsisut periarfissaqanngillat. Coachimut, oqaloqatiginnittartumik imaluunniit tarnip pissusaanik ilisimasalimmik oqaloqateqassagunik nammineq akiliisariaqarput. Kisianni ilinniartuugunik ilinniarfiup akilissavaa.

– Tamanna pissusissamisuunngilaq. Taamaammat ikiorserneqarneq inuusuttumut akeqassanngilaq. Ilinniartuuneq imaluunniit ilinniartuunnginneq apeqqutaanngilaq. Tamarmik assigiimmik pisariaqartitsipput, Steve Sandgreen oqarpoq.

 

Aaqqissuisut

Nunarput pillugu sammisaqarfik

%d bloggers like this: