Inuttut iliuuseqaqqaartalinngikkutta pisortat ingerlataat naalagaassapput

Atassut sinnerlugu Inatsisartunut qinigassanngortittoq, Aqqalu Jerimiassen oqarpoq, nunarput kivinniarlugu inuiattut uinnerusariaqalersugut.

– Naalagaaffinngornissaq taamaallaat misigissusilersornerujussuaq atorlugu piviusunngortinniarneqarpoq, Aqqalu Jerimiassen oqarpoq.

– Ukiumut Naalagaaffiup tapiissutai ingerlatsiviillu suli naalagaaffiup ataaniittut aningaasaartai katillugit 4,7 milliarditut annertussuseqartut eqqaaneqartarpoq. Taakkualu misigissutsit atorlugit matuneqarunnanngillat. Aatsaat pisinnaavoq nammineq siulliulluta innuttaasutut iliuuseqaqataalerutta. Iliuuseqaqaattalinngikkutta soorunami pisortat ingerlataat naggataani iliuuseqarniartartuujuassapput, Aqqalu oqarpoq.

– Nunanit allaniit suliartortut iluarineqanngittaqaat, taamaakkaluartorli aamma uagut nammineq maalaannarsinnaanngilagut iliuuseqarfiginiarnagulu, allammi utaqqiinnarlugit qaqagu iluamik aallassagatta, taanna aperivoq.

– Aap, tusartuarparput siuligut tassaasimasut imminnut napatittut. Tamannali piffissaq qaangiutereerpoq, kingumummi isigiuarluta piniarutta eqqartortuarlugillu qanoq pitsaatigisimanersut qaqugu siumut aallariassagatta? Ullumikkumiik ingerlasa, qanga pisimasut nunasiaataasimanerullu nalaani anniaatiginiarneqartut illikartiallalaarlugit, qanoq ingerlariaqqissinnaanerput nunarput pillugu eqqarsaatiginerusariaqalerparput, Aqqalu Jerimiassen oqarpoq.

– Qaqugorsuarmut taamaallaat aalisarneq isumalluutigisinnaanngilarput, takoreerparpummi qeqertarsuup tunuani qaleralinnik aalisarneq unittuuallammat qanoq nunatta aningaasaqarneranut sunniuteqariataarsinnaaleraluarnera. Aalisarnerup saniatigut allatigut inerisaanerulertariaqarpugut, tassami ingerlatsinermut aningaasarpassuit matussusersinnaalerniarutsigit inuiaqatigiittullu atugarissaarnerulerniarutta tamatta pilersitsiortortariaqarpugut, Aqqalu oqarpoq.

Taassumap assersuutigai pisiniarfinni pisiarineqarsinnaasut nunanik allaneersut aamma sanaartornerup iluani atortussat tamarmik nunami maani piunngitsut, soorlu qisuk.

 

Aaqqissuisut

Nunarput pillugu sammisaqarfik

%d bloggers like this: