Inunnik kisitsinissaq eqqasuutigigaat

Alaskami illoqarfimmi Bethelimi siuttut 2020-mi USA-mi inunnik kisitsinissaq eqqasuuteqarfigalugu sapaatip-akunnerani kingullermi katersuupput.

Inunnik kisitsinerup inernera, Washingtonimi qitiusumik naalakkersuisut qanoq amerlatigisunik tapiissuteqarnissaanut aalajangiisuusarpoq, Alaskamilu kisitsilluartoqanngippat aningaasat ilaat annaaneqarsinnaapput.

bertel_alaska
Bethel, Alaska.

USA-mi ukiut qulikkaarlugit inunnik kisitsisoqartarpoq. Taamak Kyuk.org allappoq.

– 3 milliardit dollaringajaat (18 mia. kr., aaqq.) qitiusumik naalakkersuisuniit Alaskamut ingerlatinneqartarput, taakkulu innuttaqassutsimut tunngalluinnartuupput aamma amerlaqaat, Mike Walsh, iluanaarniutiginagu siunnersuisartunit, The Foraker Groupimeersoq, oqarpoq.

Walsh oqarpoq, USA-mi naalagaaffiit innuttaqassusianik kisitsisarnermi, Alaska kisitsiffigissallugu ajornakusoornerpaajuvoq. Avinngarusimasuni najugallit killilimmik internetimut atassuserneqarsimapput aamma allakkatigut kiffartuunneqarnerat killeqarpoq.

– Qitiusumik naalakkersuisut matumiit matumut kasuttortarlutik kisitsigajuttanngillat. Kingullermik 2010-mi kisitsisoqarmat, qitiusumik naalakkersuisut Nomemi matumiit matumut kisitsigaluarput, taamaakkaluartorli innuttaqassutsi 8 procentinik uniorpaat. Avinngarusimasuni Alaska piitsorpassuaqarpoq aamma ilinniarsimaneq qaffasinngilaq. Inuillu amerlasuut aalajangersimasumik najugaqarfeqartanngillat, Mike Walsh oqarpoq.

Eqqasuutigineqartorlu tassaavoq 2020-mi inunnik kisitsinissaq aaqqissuulluarneqarsimanani ingerlanneqarnissaa.

– Præsident Trumpi suli inunnik kisitsisartoqarfimmi pisortanngortitsinngilaq aamma siusinnerusukkut aningaasalersorneqartarsimanera naammaqqajartarsimanngilaq, Walsh oqarpoq nangillunilu:

– Kissaatigigukku Washingtonimi aningaasaliisartut Alaskamut tulluartumik aningaasaliisasut, taava Washingtonimut aallartitat oqaloqatigalugu aallartittariaqarputit.

 

 

Aaqqissuisut

Nunarput pillugu sammisaqarfik

%d bloggers like this: