Inuit sanaavinut ilisarnaat nalilik

Maannamut ilisarnaat taamaallaat Canadami niuertut siammarterisartullu aqqutigalugit atorneqarnissaa akuersissutigineqartarsimavoq. Siorna Inuit Art Foundationip ilisarnaat tiguaat nutarterlugulu.

Ilisarnaat 1958-mi Canadami naalakkersuisunit atulersinneqarpoq, siunertarineqartorlu tassaasimavoq Inuit eqqumiitsuliaat, allamiut amerlasoorujussuanngorlugit sanasartagaanut, immikkoortinneqarsinnaassasut.

Lori Idlout. Assiliisoq: Inuit Art Foundation

Qanittukkut Lori Idlout, Iqalunni eqqumiitsuliat tuniniarlugit niuertarfiutilik, ilisarnaammik atuisinnaanngorluni akuerineqarpoq. Lori Idlout ukiuni 45-ni siullersaalluni akuersissummik tunineqarpoq.  

Inuit Art Foundation ilisimatitsivoq, ilisarnaat sumut tunngatillugu kikkunnillu atorneqarsinnaanissaa oqallisigineqarluni aallartinneqassasoq.

– Ullumimut avannaani ilisarnaat atorneqarpiarsimanngilaq, kisianni ilisimasarput tassaavoq, ukiut 60-it kingulliit ingerlaneranni ilisarnaat Inuit suliaanut naleqartorujussuanngorsimasoq, Inuit Art Foundationimi pisortaq, Alysa Procida Nunatsiaq Newsimut oqarpoq.

Siorna misissuisoqarmat paasineqarpoq, ilisarnaat sulianut akisunerulersitsisartoq; agguaqatigiissillugu suliaq ataaseq 600 koruuninik akisunerulertartoq. Paasineqarportaaq ilisarnaat Inuit aningaasaqarneranut ukiumut 17 millionit koruunit missaanik naleqartoq.

– Ilisarnaat ikkukkukku, taava inuit agguaqatigiissillugu 600 koruunit missaanik akiliinerujumasarput, tassami nalunngilaat pisiartik assissaqarani Inuit eqqumiitsuliarigaat, Alysa Procida oqarpoq.

Maannamut ilisarnaat qiperukkanut assilialianullu atorneqartarsimavoq.

Maanna oqallisaasut ilagaat, atisanut allanullu atorneqarsinnaanngortinneqassanersoq, aamma Inuit kisimik atuisinnaatitaasaanersut.