Inuit kakiuisartut atornerlunneqartutut misigisimasut

Novembarip qaammataanni Københavnimi eqqumiitsulianik saqqummersitsisarfik, Galleri Øckenlund, nunat inoqqaavisa kakiuisarnermik ileqquinik sammisaqarliuni takutitsivoq. Tamannalu maanna eqqumiitsuliortut akerliunerannik aallartitsisimavoq.

maya_sialuk
Maya Sialuk Jacobsen. Asseq nammineq pigisaq.

Eqqumiitsuliortut saqqummersitsinermut qisuariaateqarsimasut ilagaat Maya Sialuk Jacobsen, taannalu ullumikkut Danmarkimi illoqarfimmi Svendborgimi najugaqarpoq, ilaatigullu Inuit kakiusarnerat aallullugu suliaqartarluni.

– Saqqummersitsineq uagut ileqqutsinnut suussupaginnilluni Europamiut paasinnittaasiat qitiutillugu ingerlanneqarpoq, aamma iluarinninnginnera saqqummersitsivimmut apuussimavara. Paasinerluilluni Europamiut paasinnittariaasianik aallaaveqarnini pissutigalugu, nunat inoqqaavisa kakiuisarnerat inunnik allanik piginnittussaanermut, tunniutiinnarsimanermut aamma angutit arnanut pissaaneqarnerminnut takutitsinerattut nassuiarniarneqarsimavoq. Taannalu oqaluttuaq kukkunerusinnaanngilaq, aamma taamaammat iluarinninnginnera apuussimavara, Maya Sialuk Jacobsen oqarpoq.

Saqqummersitsivimmiit akissummi takuneqarsinnaavoq, tamanna siunertarineqarsimanngikkaluartoq.

– Maanna saqqummersitsiviup assilissat internetimiit peersimavai aamma sumi allani peqassappat taakku peerneqarnissaat sulissutigalugu aallartissimavarput, saqqummersitsivik akissuteqarluni allappoq.

Maya Sialuk Jacobsenip ulluinnarni eqqumiitsuliortutut ingerlatsisutut akueriuminaatsippaa, ileqqut naapertorlugit kiinat kakiortortarneri taamaallaat “sanaqqiinertut” suussusersineqassappata.

– Naak Danmarkimi nunaaqqami najugaqaraluarlunga, aamma Inuit kakiuisarnerinik suliaqarnera ilaatigut Inuit arnartaasa ilinniartinnerat aqqutigalugu ammalluinnartumik ingerlakkaluarlugu, aamma peqatigiiffiga (De Professionelle Uafhængige Tatovører, aaqq.) aqqutigalugu inatsisiliornermut sunniuteqaqataanniaraluarlunga, aamma naak nipituuliorlunga Danmarkimi kiinakkut kakiortuisarnerup sutigut tamatigut inerteqqutaalernissaanut akerliunera takutissimagaluarlugu, saqqummersitsinerup ingerlanneqarnissaanut kulturikkut periutsit, pingaartitavut qanorlu paasinnittariaaseqarnerput pillugit attavigineqarsimanngilanga, Maya oqarpoq.

– Inuit aamma nunat inoqqaavi sinnerlugit saqqummersitsivimmut saaffiginnissuteqarlunga allassimavunga. Saqqummersitsisarfik qinnuvigisimavara saqqummersitsinerit taamak ilusillit unitseqqullugit; Kulturi naalagaaniartoq kulturimut allamut inorsarnerusutut isiginnittariaaseqarluni oqariartuutinik sangutitsisarnera peqataaffigeqqunagu, aamma tamanna kulturi pineqartoq peqataatinneqarani pisimappat, Maya oqarpoq.

– Taamak pisoqaraanngat paasinniffissaq ersernerlulertarpoq aamma amerlanertigut nunat inoqqaavisa oqariartuutaat ilisarsaajunnaarlugit allanngortinneqartarput. Taamatuttaaq ippoq uagut Inuit kakiuisarnitsinnut oqaluttuat paasinnittariaatsillu eqqarsaatigalugit, Maya Sialuk Jacobsen naggasiivoq.

 

Aaqqissuisut

Nunarput pillugu sammisaqarfik

%d bloggers like this: