Inuit ikiliartornerat qanoq nassuiaatissaqarami?

Nunatsinni inuit ikiliartornerat tamatta ilisimalersimavarput, aamma ukiumut inunngortartut toqukkullu qimaguttartut eqqarsaatigissagaanni, ukiumut agguaqatigiissillugu 300-nik amerleriartartussaagaluarpugut.

Hans-Peter Ananiassen, Nuummi angerlarsimaffeqanngitsut sinnerlugit partiinut apeqquteqarusussimavoq. Taanna oqarpoq, nunatsinni inuerukkiartornera pimoorunnerullugu akissutissarsiniarneqartariaqartoq.

– Tassami pinngitsoorani nassiuaatissaqassaaq, aamma politikkikkut suliaallit tamassumap akissutissarsinissaa soqutigisariaqaraluarpaat, Hans-Peter Ananiassen oqarpoq.

Taamaattumik apeqqutaa ullup ingerlanerani partiinut ingerlateqqissavarput, neriulluta akiumasoqarumaartoq:

“Namminersulernerup (21. juni 2009) kingorna nuna inuerukkiartorpoq. Tamanna qanoq nassuiaatissaqarsoraasiuk?”

Illittaaq atuartartutut akissutissaqartikkukku una aqqutigalugu Nunarput allaffigisinnaavat.

Innuttaasut (januaarip aallaqqaataani):

2009: 56.193
2018: 55.877

Innuttaqassutsi ataatsimut isigalugu kisitsisinik atuarnissaq pillugu Naatsorsueqqissaartarfik ima nassuiaateqarpoq:

“Ukiuni qulini kingullerni innuttaasut amerlassusaat 56.000-it 57.000-llu akornanniittarsimapput. Taakkunanna 6.000-it Kalaallit Nunaata avataani inunngortuupput. Kalaallit Danmarkimi najugaqartut 15.000-iupput ukiunut qulinut sanilliullugu kalaallit Danmarkimi najugaqartut 3.000-nik amerlisimapput. Ukiumut inunngortartut 800-it missaanniipput, ukiumullu 500-it missaat toqusarput. Inunngortut 300-nik amerlanerussuteqarnerat pissutaalluni inuit amerliartortussaagaluarput. Inuit amerliartunnginnerannut Kalaallit Nunaanniit nuttartut Kalaallit Nunaannut nuuttartunit amerlanerunat pissutaavoq. Ukiuni kingullerni Danmarkimi kalaallit amerliartortutut oqaatigineqarsinnaavoq, ukiumut Kalaallit Nunaannit nuuttut 300-sarnerat pissutaalluni.”

Aaqqissuisut

Nunarput pillugu sammisaqarfik

%d bloggers like this: