Inuit ersiortunngorsimapput

AAQQISSUISUT. ‘Nunarput’ maannamut piffissap sivikitsuinnaap iluani ingerlasimavoq. Tusagassaqartitsineq paasiniaanerillu ingerlannerini maluginiarsimasaq pingaarneq tassaavoq, politikki akerleriissutaasinnaasullu pineqartillugit inuit tunuarsimaalertarnerat. Akerliliiumanngittarnerat.

Oqaatiginngiinnarlugu malunnartumilli pineqartarunartoq tassaavoq, suliffigisamut tunngatillugu arlaatigut imminut kinguneqarlutsitsisinnaaneq. Oqaaseqarsimanerup kingorna suliffigisap iluani isiginerlunneqalersinnaaneq. Ilami soraarsitaaratarsinnaaneq. Siunissami suliffissarsiornermi ajornartorsiortitaalernissamik ilimasunneq.

Ilumullumi inuiaqatigiit tassunga killissimappata, taava aatsaat qajassuunnagu oqaaseqarnissamut piffissanngorsimassaaq. Nunatsinni aqutsisut inuit oqaaseqarsinnaanerannik killilersuisutut misigisimagaanni, taava suaartarluni allanngortitsinissamik piumasaqarnissaq piffissanngorsimassagaluarpoq.

Arlaanik inuiaqatigiit qanoq aaqqissuunneqarsimanerat aaqqissuunneqarniarneralluunniit iluarinngisaqarfigisimagaanni, akissutissaanngitsoq tassaavoq oqarani matoorinernut peqataalernissaq.

Aatsaat ersiorani ammasumik oqallisiginerisigut inuiaqatigiit pitsaanerusussamut alloriaqqissinnaapput. Ammasumik inuiaqatigiit pillugit oqallittoqartinnagu inuiaqatigiit piumasaat naapertorlugu ineriartortoqarnavianngilaq aamma allannguisoqarnavianngilaq.

Taamaattumik: Pisinnaatitaaffigaat. Oqarit!

 

Aaqqissuisut

Nunarput pillugu sammisaqarfik

%d bloggers like this: