INSIDE-OUT

Aggustip qulingata tungaanut Jukke Rosing assilisimasaminik Københavnimi Kalaallit Illuutaanni saqqummersitsivoq. Assilisat atorlugit kinaassutsip suuneranut apeqquterpassuarnut akineqarsimanngitsunut, Jukke Rosingip appakaatsippaatigut.

Inuit amerlasuut inuunermi ilaanni kinaassutsi apeqqusertarpaat, kinaassuserlu qanoq imminut paasinnittariaaseqarnermut tunngaviummat tupinnanngitsumik inuit akornanni oqallisigineqartarpoq.

Kisianni allat namminermut isummersornerannut naammattuugaqartuarluni aamma qanoq ileqqoqartussaagaluarnermik ilitsersuiniartuartoqartillugu qanoq misiginarpa, aamma qanoq isikkoqarneq ilanngullugu pineqalersimappata? Sumiuuneq sumullu atasutut misigisimaneq ilanngussuuneqaleraangata?

Jukke Rosing nammineq kalaaliuvoq danskisut oqaasilik, aamma tamanna pissutigalugu apeqqusersorniarneqartarsimavoq – isummat pigiliutiinnarneqarsimasut naammattoortarsimaqai.

Kisianni kinaassutsini kimut kikkunnullu uppernarsarlugulu, kimut kikkunnullu imminut pinngitsuutissagami?

Saqqummersitsineq pillugu Jukke Rosing nammineq ima nassuiaateqarpoq:

Kalaallit Illuutaanni saqqummersitsineq pinniitsunik pinnersunillu takutitsiviussaaq. Taanna mianersorluni ingerlaneq puullaaqinermik isumatsassimanermillu misigissuseqarfiusartoq,  ujariatsinermik ulikkaartoq taamaattoq aamma tulluusimaarnermik nuannaarnermillu ilaqartoq.

Kinaassusermut tunngatillugu allat apeqqusersuiuarnerannut akissuteqartuartariaqarnermut akisussaaffeqartutut misigisimaneq. Apeqqutit taakkorpiaat nalornilersitsisartut pakatsisitsisartullu.

Taamaattoq saqqummersitsineq una kinaanernut tunngatillugu ittuukuluttuunnginnissannut sorsuuteqaqqullunga aallartitsivoq, aamma taarsiullugu tulluusimaarlunga erseqqissumillu qungujussaqarlunga apeqqutit akisassagikka.

Jukke pillugu
Jukke Rosing Nuummi 1984-imi inunngorpoq.

2008-mi assiliinermut ilinniarfimmi, Fatamorganami aallartippoq, 2009-milu naammassilluni.

Assiliineq atorlugu eqqumiitsuliortutut suliaqarnermi saniatigut, Jukke angerlarsimaffinni peqqissaasutut sulisarpoq, tassani inuit ikiortariallit sullillugit.

Assit nassuiaatitalersukkat alakkakkit:

Aaqqissuisut

Nunarput pillugu sammisaqarfik