Qaanaaq.

Innuttaasut allamik kissaateqanngippata killilersuisoqassaaq

Inatsisartunut ilaasortaq, Mikivsuk Thomassen (IA) Naalakkersuisunut apeqquteqarpoq, Qaanaami imigassanik kimittuunik nioqquteqarneq pisiniarfimmi killigitinneqartoq 15 procenti Naalakkersuisuniit qanoq isummerfiginiarneqarnersoq, aamma killiliussaasimasoq allanngortinneqassamaarnersoq.

– Qaanaami imigassaq pillugu suliniuteqartoqassappat suliniut qaqugu naammassillugulu saqqummiunnissaa naatsorsuutigineqarpa, Mikivsuk Thomassen ilaatigut aperivoq.

Naalakkersuisut akissuteqarnerminni allapput, pissutsit allanngortinneqarnissaanut pilersaaruteqartoqanngitsoq.

– Qaanaami imigassanik kimittuunik inerteqquteqarneq 2001-imi pilerpoq. Angajoqqaat imigassamik atornerluinerat pissutigalugu meerarpassuit sumiginnarneqartarnerat tunngavigalugu inerteqqut atuutilerpoq, Doris J. Jensen akissummini allappoq.

– Isumaqarpunga najukkami inatsit innuttaasunut iluaqutaassasoq, atuutsinneqarfianilu siunertarineqartoq naapertorlugu sunniuteqassasoq. Nalunaarut atuuttoq siunertarisamik eqquutititsinngippat tamanna pillugu misissuerusussinnaavunga. Tamannali innuttaasut kissaatigisariaqarpaat, Doris J. Jensen allappoq.

Apeqqutigineqartut sinneri, tassalu Qaanaami imigassaq pillugu suliniuteqartoqassappat suliniut qaqugu naammassillugulu saqqummiunnissaa naatsorsuutigineqarnersoq aamma Qaanaami imigassamik ammaasoqassappat, Naalakkersuisut Qaanaami innuttaasunut pinaveersaartitsinikkut katsorsaasinnaanermullu tunngasunik qanoq iliuuseqarniarnersut, Naalakkersuisup akiumanngilai.

– Qaanaami killeqanngitsumik imigassanik sakkortuunik tuniniaasoqartalernissaanik pilersaaruteqartoqanngimmat apeqqutip isummerfiginissaa naleqqussorinngilara, Naalakkersuisoq Mikivsuk Thomassenimut akivoq.

Aaqqissuisut

Nunarput pillugu sammisaqarfik