Sødisbakke tassaavoq inersimasut annertuumik ataavartumillu innarluutillit najugaqarfiat, immikkut ilinniarsimasunik sulisulik. Assiliisoq: Sødisbakke

Innarluutillit atugaat pitsaanerussapput

Naalakkersuisunut ilaasortaq, Anthon Frederiksen, qanittukkut Danmarkimi innarluutillit najugaqarfiat Sødisbakke pulaarsimavaa, pulaarnerminullu atatillugu innarluutillit atugaannik pitsanngorsaanissaq siunertaralugu suliaqartoqartoq oqaatigaa.

Sødisbakke tassaavoq inersimasut innarluutillit najugaqarfiat, najugaqarfillu innarluutilinnut assigiinngitsunut naleqqussarneqarsimalluni ingerlanneqarpoq. Sødisbakke Mariagerip kangerluani inissisimavoq.

– Naalakkersuisut innarluutillit atugaat pitsanngorsaaviginiarlugit suliniuteqarput. Ilaatigut inatsisit naleqqussarnerisigut, kisianni aamma ingerlaavartumik innarluutilinnut angerlarsimaffiit sinaakkutaasa pitsanngorsaavigineqartarnerisigut, Anthon Frederiksen pulaarsimanerminut atatillugu oqarpoq.

Ukiut marluk matuma siorna kalaaleq siulleq Sødisbakkemi najugaqalerpoq, ullumikkullu Sødisbakkemi kalaallit arfinillit najugaqarput. Sødisbakkemik suleqateqarnerup ilagaa sulisunik paarlaasseqatigiittarnissaq.

– Uagutsinnut unammillernarnerpaat ilagaat, ulloq unnuarlu angerlasimaffiutitsinni ilinniarsimasunik sulisoqarnissap qulakkeernissaa, kiisalu pisariaqartitanik ingerlaavartumik piginnaasat qaffassartuartarnissaasa ingerlannissaat. Taamaattumik nuannaarutigisorujussuuara, uani isumaqatigiissutitsinni periarfissaqalersimagatta sulisunik paarlaasseqatigiinnikkut aaqqissuusseqqinnikkut ineriartortitseqqinnissamut, Anthon Frederiksen oqarpoq.

Innarluutillit atugaasa pitsanngorsarneqarnissaat siunertaralugu inatsisit suut naleqqussarneqalernersut pillugit Nunarput apeqquteqarniarsimagaluarpoq, kisianni maannamut Naalakkersuisoq piffissaqarsimanngilaq. Taamaattumik Nunarput Naalakkersuisumut allakkatigut apeqquteqarpoq.

Aaqqissuisut

Nunarput pillugu sammisaqarfik