Innaarsunni tunisassiorfik innaarsuusap 30 meterisut qatsitsigisumiittup qaavaniippoq. Assiliisoq: Royal Greenland

Innaarsunni tunisassiorfik qimanneqarpoq

Ilisimatinneqarpugut tunisassiorfeqarfiup iluanut appakaakkutta politiit maleruaqqusaannik unioqqutitsisutut unnerluutigineqassasugut. Uagut nammineq naliliisinnaanerput naapertorlugu tunisassiorfik qutsissumiippoq navianartorsiorfiusumiiganilu, tunisassiorfimmik ingerlatsisoq, Flemming Andersen anersaaruluppoq.

Royal Greenland ilisimatitsivoq, Innaarsunni tunisassiorfik iluliarsuup nunaqarfiup avataaniittup aseroratarsinnaaneranit qimarngutitsiffiusunut siusinnerusukkut ilaasimanngikkaluartoq, kisianni ippassaq ilanngutitinneqartoq, aamma naak tunisassiorfiup qerititsiveqarfia nakkutigineqanngikkuni qalerallit 175 tonsit asiuinnarsinnaasut.

– Iluliarsuaq ippassaq tikillugu alaatsinaattuarsimavarput, iluliarsuullu aseroratarsinnaanera sillimaffigalugu qimarngutitsinissamik pilersaarut piareersimatissimavarput. Naliliisinnaanerput naapertorlugu tunisassiorfik qutsissumiippoq navianartorsiorfiusumiiganilu, taamaakkaluartorli ilisimatinneqarpugut tunisassiorfeqarfiup iluanut appakaakkutta politiit maleruaqqusaannik unioqqutitsisutut unnerluutigineqassalluta, Flemming Andersen, Upernavimmi nunaqarfiinilu tunisassiorfinnut ingerlatsisoq oqarpoq.

– Qalerallit 175 tonsit missaanniittut qerititsivimmiittuutigaagut. Qerititsiveqarfipput nakkutigisinnaanngikkutsigu qerisuutigut asiuinnassapput. Paasitinneqaraluarpugut nukissiorfik avataanit aqunneqarsinnaasoq, orsussarli nunguppat qerisuutigut annaasinnaavagut, Flemming Andersen oqarpoq.

Innaarsunni tunisassiorfimmi ingerlatsisoq, Hans Peter Kristensen, ippassaq ataasinngornermi ualikkut sisamat missaanni kommunip allaffeqarfianukaqquneqarsimavoq, tassanilu ilisimatinneqarpoq qimagussuuffiusoq annertusineqartoq aammalu tunisassiorfik navianartorsiorfiusup iluaniittutut naatsorsuutigineqalersimasoq.

– Arfininngulersoq unnuarsiortussat suliartoqqammersullu tunisassiorfimmut uterpunga. Sulisut tunisassiorfimmit qimagunnissaannik oqarfigaakka, unnukkullu arfineq-pingasut missaanni killilersuutit aappalaartunik qaqortunillu qalipaatillit atorlugit tunisassiorfik pallitsaalineqarpoq, Hans Peter Kristensen oqarpoq.

– Tunisassiorfimmi 25-t missaannik paarlakaattunik sulisoqarluta ulappusileruttoraluarpugut, Hans Peter Kristensen oqarpoq.

Aaqqissuisut

Nunarput pillugu sammisaqarfik