Inatsisip sunniutissai takoqqaartigik

Peqqissutsimut Naalakkersuisoq, Doris J. Jensen, imigassaq pillugu inatsit sammillugu inuussutissarsiortut ataatsimeeqatigigamigit oqariartorpoq, inatsisip piaarnerpaamik allanngortinneqarnissaa inuussutissarsiortut kissaatigigaat. Tamannalu isumaqatiginngilara, taanna oqarpoq.

Demokraatit nalunaarutigereerpaat, Inatsisartuni ukiaanerani ataatsimiinnissamut allannguutissatut siunnersuummik saqqummiussaqarniarlutik. Doris J. Jensenilli kissaatigaa inatsit sunniuteqarnissamut piffissaqartariaqartoq.

– Inuussutissarsiortut sinniisaat naapikkakkit inatsillu pillugu eqqarsaatersuutaat tusarakkit nuannaarutigaara. Pissusissamisoortutut isigaara inuussutissarsiortut, imigassamik tuniniaanermik sassaalliuteqarnermilluunniit aningaasarsiuteqartut, inatsit pillugu isornartorsiuteqarmata, tassami inatsit inuussutissarsiortunut nutaanik piumasaqaateqarpoq pingaartumik ussassaarinermut assiaqusersuinermullu tunngatillugu, naalakkersuisoq allappoq.

– Ataatsimiinnitsinni inuussutissarsiortunit periarfissatut ammaanneqarpoq, imigassamik atornerluineq pitsaaliorniarlugu siunissami inuussutissarsiortut paasititsiniaanermi inerisaanermik peqataanissaat. Tamanna tapersersornaqaaq, Doris J. Jensen oqarpoq.

– Inuussutissarsiortut imigassaq pillugu inatsit isornartorsiorpaat. Inuussutissarsiortut ilaatigut isumaqarput Kalaallit Nunaanni immialiat inatsisip ilungersunartorsiortikkai inatsillu imigassamik unioqqutitsilluni tuniniaanermik annertusisitsisoq. Isummat taamaattut inuussutissarsiortut aamma tusagassiuutinut saqqummiunnikuuaat. Isumaqarpunga inuussutissarsiortut – aamma taakkununnga tunngatillugu – aaqqiissutissanik pitsaasunik tapersiisinnaasut. Immialianut tunngatillugu pisiniarfiit sassaallertarfiillu, assersuutigalugu assiaqusersorneqartut iluanni ussassaarinikkut, najukkami immiorfiit suli tapersersornissaannut periarfissaqarput, naalakkersuisoq oqarpoq.

– Inatsit, ukioq manna marsip aallaqqaataani atuutilersoq, taamaallaat qaammatialunni atuunnikuuvoq. Taamaattumik isumaqarpunga inatsisip allanngortinnissaanik oqalunnissaq siusippallaartoq, Doris J. Jensen oqarpoq.