Inatsisiliortuuneq pisussaaffiliivoq

Partii Naleraq sinnerlugu qinigassanngortittoq, Pele Broberg oqarpoq, ineriartortitsinissamut tunngassuteqartut, aalisarneq ilanngutissanngikkaanni, sammineqarnerat unissimasoq.

– Partiilersornersuut aqqani suleqatigiinneq amigarpoq, aamma immikkut soqutigisaminnik illersuisarnerat suli takussaasaqaaq. Tamanna immini ajunngilaq, kisianni ataqatigiinnerusumik aaqqiissutissat pineqarpata ajunnginnerussaaq, Pele Broberg oqarpoq.

– Soorlu mittarfiit pineqartillugit mittarfeeqqanik neriorsuuteqartoqalerpoq, tassagooq angallanneq nunatta iluani ataqatigiissaarniarlugu. Nunatsinni 1990-ikkunni tallimanik mittarfiliortoqarpoq 799 meterinik takissusillit, taakku atorlugit takornariarpassuit takkussuutilernissaat ilimagineqarpoq, tassami angallanneq akikillissasoq oqaatigineqarpoq. Suli tamanna anguneqanngilaq, Pele Broberg oqarpoq. – Assigiinnarpaa nunaqarfiit illoqarfiillu tamavimmik mittarfilersorneqarnissaanik neriorsuiinnarunik.

Taanna oqarpoq tunngavilersuinerusumik oqallinneq ingerlanneqartariaqartoq, isumaqarluni ukiorpassuarni pissuserineqartarsimasoq unittariaqartoq, tassalu piviusunngortinnianngisanik qineqqusaaruteqarneq.

– Inuppassuit pakatsisaqaat, aamma kikkunnut tamanut suugaluartunilluunniit neriorsuuteqarniarsarisarneq politikikkut aqutsinermut tatiginninnermik pilersitsineq ajorpoq. Assersuutigalugu allaffissorneq annikillisarniarlugu misissuinerit arlallit piumaneqartarput, kisianni oqariartuutip saniatigut qanoq iliortoqarnissaa akissutissaqartinneqanngilaq. Ullumikkut kommunini Namminersorlutillu Oqartussat iluani sulisut 10.000 sinnerpaat. Aamma nunarsuarmi allaffissornerpaanut ilaavugut. Taamaattumik allaffissortussanik atorfinitsitsisarneq unikaallatsinneqassaaq, aamma qinikkat namminneq isummersorlutillu aaqqiissutissanik tunniussisinnaanerat tatigineqarnerusariaqarpoq, Broberg oqarpoq. – Tassami Inatsisartunut ilaasortanngortussat inatsisiliortussaapput, tamannalu pisussaaffiliivoq.

– Nuummiit allaffissorneq aqqutigalugu qitiusumik aqutsineq unitsinneqassaaq. Aatsaat taamaasilluta pitsannguisinnaalissaagut allaffissornersuarlu millisarlugu. Aamma qungujunnartartoq tassaavoq, pilersitserusuttunut tapiissuteqarnissamut periarfissiinerat pappiliarpassuarnik suliaqalernissamut piumasaqaatitaqarmata. Pilersitsisartut allaffissornersuarmut naleqqussarnagit killormut naleqqussarneq ingerlanneqassaaq , taanna oqarpoq.

– Ukiuni kingullerni pisortat A/S-liornerat takoqqittalerparput. Tamakku oqallisigineqannguaratik pilersinneqartarput, aamma naak sullissisussat piareersimasut pigereerneqaraluartutut isikkoqaraluartoq. Soorlu Kalaallit Airports pilersinneqarpoq Mittarfeqarfinnut inissillugu. Inuiaqatigiinnut akissaajaassuaq. Taakku aningaasarpassuit 2014-mi politikerit neriorsuutaanut atorneqarsimagaluarpata (mittarfiit 1.199 meterit, aaqq.), Nuummi Ilulissanilu mittarfiit tallilerneqarsimasut piareersimassagaluarput, tassami Mittarfeqarfiup pilersaarutit taakku ukiorpassuarni pigereerpai, Pele Broberg oqarpoq.

– Isumaqarpunga politikikkut sulineq pisussaaffileraanni angusassat qaninnerulersinnaasut. Aamma allaffissortut utaqqinagit politikikkut siunnerfiit Inatsisartuni pisussaaffiliisumik politikerit akornanni aalajangersaavigineqarlutillu aallaavilersornissaat aallartittariaqalersoraara, taanna oqarpoq.

 

Aaqqissuisut

Nunarput pillugu sammisaqarfik

%d bloggers like this: