Inatsisartut siulittaasuat Naalakkersuisunut ersarissaali

Mittarfiliornissat pillugit Inatsisartut qulaatiinnarlugit qanoq suleriuseqartariaqarnermik Naalakkersuisut arlaleriarlutik tusagassiorfitsigut oqaaseqaqattaarnerat pissusissamisuunngilluinnarpoq, IA sinnerlugu Inatsisartunut ilaasortaq, Múte B. Egede allappoq.

– Naalakkersuisut ataqqisariaqarpaat inatsisissatut siunnersuutertik maanna Inatsisartunit suliarineqarmat Inatsisartunilu ilaasortat amerlanerussuteqartut suliap nukingerfiunngitsumik sukumiisumillu suliarineqarnissaa kissaatigimmassuk.

– Aammaarluta Inatsisartut siulittaasuat kaammattorumavarput, Naalakkersuisunut ersarissaassasoq, suliap ingerlasarnera ataqqineqarluni ingerlasoqassasoq aamma qulangiisutullusooq Inatsisartut sulinissaanut sunniiniarneq akuerineqarsinnaanngitsoq unitsinneqarluinnartariaqartoq, Múte B. Egede oqarpoq nangillunilu: –  Pissaanerummi qanoq agguarneqarsimaneranut ataqqinnippalunngitsumik oqariartoqattaarnerit ataqqeqatigiilluni suleqatigiinnissamut iluaqutaanngivipput.

Naggataatigut Múte B. Egede erseqqissaavoq, Inuit Ataqatigiit aaqqissuusseqqinnissanut peqataassallutik piareersimammata.

– Inuiaqatigiit aningaasaataat atorlugit aningaasaleerujussuarnissat suliarinerat peqqissaartumik nukingerfiunngitsumillu toqqammaveqarluni ingerlanneqassaaq, Múte B. Egede allappoq.

Aaqqissuisut

Nunarput pillugu sammisaqarfik