Inatsisartut qinigaaffimmi 127-nik inatsisiliorput

Inatsisartut atuuttut 2014-mi novembarip 28-ani qinersisoqarnerata kingorna 127-inik inatsisiliorsimapput.

Amerlanerit pisortat qanoq ingerlatsinissaanut tunngasuupput allaffissornerullu iluani ingerlatsisunit pisuullutik, soorlu aatsitassalerineq, partiit, A/S-it nutaat il.il. Inatsisiliat arlallit pioreersunut kukkusoqarsimaneranut imaluunniit erseqqissaanernut tunngapput.

Inatsisiliat ima agguataarsimapput; 2015: 40, 2016: 36, 2017: 51.

Innuttaasunut toqqaannarnerusumik sunniuteqarsinnaallutik piffissap ingerlanerani inatsisiliarineqartut tassaapput;

(2015)
– Pisortanut akiitsut akilersinniarneqartarnerat pinaveersaartinneqarnissaanullu inatsit.
– Sumiiffinni nunami aalajangersimasuni takornariartitsinermut akuersissuteqartarnissamut inatsit.
– Utoqqalinersiaqarneq pillugu inatsit (qaffaaneq).
– Inissiani attartortittakkani ineqarnermut tapiissutit pillugit inatsit.
– Siusinaartumik pensionisiat pillugit inatsit.

(2016)
– Timersorneq timigissarnerlu pillugit inatsit.
– Soraarnerussutisiaqarnissamut aaqqissuussinermut pinngitsoorani ilaanissaq pillugu inatsit.

(2017)
– Inuit Innarluutillit illersuisuat pillugu inatsit.
– Piginneqatigiilluni inissiat pillugit inatsit.
– Imigassaq pillugu inatsit.