Inatsisartut isumaqatigiipput: Qinersissaagut apriilip 24-ani

Ullumi inatsisartut immikkut ittumik ataatsimiigiaqquneqarsimallutik qinersinissaq pillugu inatsisissaq suliaralugu ingerlappaat.

Pisarnertut Inatsisartut siulittaasuat tikilluaqqusereermat, ataatsimiinneq arqarngup qaangilaaraa aallartippoq.

Naalakkersuisut Siulittaasuat naatsumik qinersinissamut inatsisissatut siunnersuut inatsisartunut suliareqqullugu tunniuppaa.

Tamatuma kingorna partiit oqaaseqartui tulleriiaarlutik oqaaseqarput.

– Naalakkersuisut siulittaasuata qinersisitsinissamut kissaataa annerusumik oqaaseqarfiginagu tusaatissatut tiguarput, Siumup oqaaseqartitaa, Jens Immanuelsen oqarpoq.

– Qinersilerpugut, inuit oqartussaaqataanerat timitalerneqalerpoq. Naammassisaqarsinnaassuseqarneq tullinnguuttariaqarpoq. Suliat unitsittaqattaarnagit ingerlanneqartariaqarput, tamannalu siuttoqarluarnikkut qulakkeerneqartariaqarpoq, IA-p oqaaseqartitaa, Sara Olsvig ilaatigut oqarpoq.

– Qinersinissaq suaarutigineqarmat nuannaarutigeqqaarput. Kikkut tamarmik qineqqusaarluarnissaanik kissaappagut, Demokraatit oqaaseqartitaat, Randi V. Evaldsen ilaatigut oqarpoq.

– Inatsisartut nalinginnarmik ataatsimiinissaanut sukumiisumik piareersarsimagaluarluta ajuusaaritigaarput Naalakkersuisut Siulittaasuat tusagassiuutitigut qinersisitsinissamik nalunaaruteqarsimammat, pingaartumik ajuusaarutigaarput suliassat naammassineqanngitsoorlutik aningaasarpussuit asuli atulussinnarneqarsimammata, Partii Naleqqap oqaaseqartitaat, Anthon Frederiksen ilaatigut oqarpoq.

– Inuit oqartussaaqataaneranut sutigut tamatigut tapersersuisuuvunga, aamma taamaakkami qinersisitsinissaq tikilluaqqungaarpara. Kisianni ersernerluppoq sooq massakkorpiaq qinersisitsinissamik suaaruteqartoqarnera, aamma tamanna Inatsisartut qinigaaffiisa naaliivinneranni pimmat. Tassami tatiginninngissummik tunniussisoqarsimanngilaq, Suleqatigiissitsisut partiiata oqaaseqartitaat, Michael Rosing ilaatigut oqarpoq.