Inatsisartut atorunnaarsinneqalersut

Danskit naalagaaffiata ippassaq arfininngornermi marsip 31-ani allakkatigut Namminersornerullutik Oqartussat ilisimatippaat, ukiut sisamat tulliuttut ingerlaneranni Inatsisartut atorunnaarsikkiartuaarneqassasut.

Naalagaaffimmi ministeriunermut qanillutik atorfillit oqarput, Naalagaaffiit Peqatigiiffiat oqaloqatigereerlugu tamanna pisussanngortinneqartoq, aamma NATO-mi siuttoq, USA, paaseqatigalugu tamanna pissasoq.

– Naalagaaffiit Peqatigiit uatsinnut apeqquteqaateqarnerat tunngavigalugu tamanna pisussanngorpoq. Pineqartoq tassaavoq, naalagaaffiup ataatsip iluani arlaliulluni aqutsiniartoqarsinnaanngimmat, aamma nunanut allanut tunngatillugu Kalaallit Nunaat oqaaseqarsimagaanngami paatsiveerunnartutut tiguneqartarsimammata, ministeriunermut qanilluni atorfilik oqarpoq.

– Danmarkimi nunap immikkoortuini allani aaqqissuussisimaneq assigalugu siunissami ingerlatsisoqalissaaq, imaappoq taamaallaat Amtini suliassat assingi Kalaallit Nunaanniit ingerlanneqalissapput, tassalu peqqinnissaqarfik. Sinneri nunap immikkoortui assigalugit kommuninit ingerlanneqassapput, taamalu Inatsisartoqarnissaq pisariaarutissaaq, aamma soorlu Bornholmimi immikkut inatsisiliortussanik peqanngitsoq, taanna oqarpoq.

Pissutaanerarpaa Naalagaaffiit Peqatigiiffiat naapertorlugu Kalaallit Nunaat pingasunik atorniarsimanngisaminik periarfissaqareersimammat, tassaluni naalagaaffinngorneq, qilersorsimanngitsumik suleqatigiinneq aamma kattutivinneq.

– Siulliit marluk periarfissaajunnaareersimasut Naalagaaffiit Peqatigiiffiat ilisimatitsivoq. Taamaattumik siunissaq eqqarsaatigalugu periarfissatuaasoq tassaavoq kattutivinneq. Kalaallit Nunaallu naalagaaffinngortussaanngimmat inatsisartoqarnissaq pisariaarutissaaq, atorfilik oqarpoq.

Naalakkersuisut siulittaasorigallagaat, Kim Kielsen, oqaaseqartinniaraluaratsigu pineqartoq pillugu oqaaseqarumanngilaq. Taanna atorfilittanut innersuussivoq. Atorfilittat saaffigigatsigit pitsaanerulinngilaq.

– Qinersinissaq sioqqullugu Naalakkersuisuugallartussat pillugit kaajallaasitaq Naalakkersuisut namminneq suliaat naapertorlugu, Naalakkersuisuugallartut avammut nalunaarutigineqareersimanngitsunik oqaaseqaqqusaanngillat. Taamaattumik pineqartoq pillugu oqaaseqarunik namminneq malittarisassaliaminnik unioqqutitsissapput, atorfilittat oqarput.

– Naak apeqqutit suulluunniit atorfilittanit akineqartartussatut aalajangersarneqarsimagaluartut, taamaattoq pineqartoq oqaaseqarfigisinnaanngilarput, tassami uagut oqaaseqartartuunngilagut, atorfilittat ilisimatitsipput.

Inatsisartoqarnermut atatillugu atorfillit 500-ut missaaniittut qanoq pineqarnissaat suli isummerfigineqanngitsoq Naalagaaffik ilisimatitsivoq.

– Massakkumut Naalagaaffiup tapiissutaasa kommuninut agguaateqqittarneranik Inatsisartut suliaqartarsimapput. Tamanna allanngornavianngilaq, aamma ajornanngitsunnguamik suliassaq Naalagaaffimmit isumagineqarsinnaavoq. Akisussaaffiit arlallit maannamut killormut Naalagaaffimmut utertiortorneqalereersimammata, suliaq sukkatsisarneqaannassaaq, ministeriunermut qanilluni atorfilik oqarpoq.

 

Aaqqissuisut

Nunarput pillugu sammisaqarfik

%d bloggers like this: