Inatsisartunut allakkatigut qinersineq

Inatsisartunut apriilip 24-ani qinersisoqassaaq, periarfissaavorlu allakkatigut qinersinissaq. Allakkatigut qinersineq ullumikkuminngaanniit pisinnaalerpoq.

Namminersorlutik Oqartussat allapput, allakkatigut qinerserusuttut kommunimut inuit nalunaarsorsimaffiannut saaffiginnillutik qinersisinnaasut, aamma kommuni sorleq saaffigineqarnersoq apeqqutaanngitsoq.

Napparsimmavinni imaluunniit peqqissartarfinni paaqqutarineqartarfinniluunniit uninngasut aammalu pinerluuteqarsimasunik isumaginnittoqarfiup inissiisarfiani inissinneqarsimasut ilanngullutik allakkatigut taasisinnaapput, aamma;

  • Avinngarusimasuni najugallit qinersinermut siulersuisut toqqagaannut qinersisinnaapput.
  • Umiarsuarni Kalaallit Nunaanni angerlarsimaffeqartuni inuttat umiarsuup naalagaanit taassumaluunniit toqqagaanit qinersisinneqarsinnaapput.
  • Silasiorfinni timmisartunullu mittarfinni assigisaannilu allakkatigut taasisoqarsinnaavoq, tamannalu inummut Qinersinermut ataatsimiititaliap toqqagaanut pissaaq.
  • Danmarkimiittut Savalimmiuniittulluunniit inuit nalunaarsorsimaffiannut imaluunniit Københavnimi Kalaallit Nunaata sinniisoqarfianut ornigullutik allakkatigut qinersisinnaapput.
  • Qinersisartut Naalagaaffiup avataaniittut Danmarkip aallartitaqarfiinut imaluunniit konsuleqarfiinut ornigullutik qinersisinaapput.

Allakkatigut qinersissut kommunimut qinersisup najugaqarfigisaanut qinersisitsisumit nassiunneqassaaq. Tamannalu kingusinnerpaamik pissaaq marlunngorneq apriilip 24-at nal. 20:00. Taamaattumik allakkatigut qinerserusuttunut kaammattuutigineqarpoq, allakkatigut qinersineq piffissaalluartillugu ingerlanneqassasoq.

 

Aaqqissuisut

Nunarput pillugu sammisaqarfik

%d bloggers like this: