Imigassaq pillugu inatsit atorunnaarsinneqassaaq

Novembarip 20-ani Inatsisartuni amerlanerussuteqartut, Siumut ilanngulluni, imigassaq aalakoornartortalik pillugu inatsimmik nutaamik akuersipput. Tamannali Siumup amerlanerussuteqassaguni atorunnaarsinniarpaa.

Akuersissutigineqarneranut atatillugu Naalakkersuisut avammut oqariartorput:

– Imigassaq pillugu inatsisip Inatsisartunit akuersissutigineqarnera meeqqatsinnut ajugaaneruvoq. Tulluarporlu inatsisip ullumikkorpiaq novemberip 20-anni, tassa FN’ip nunarsuaq tamakkerlugu meeqqanut ullorititaanni, akuersissutigineqarnera. Imigassamik ajornartorsiutit peerneqassappata suliniutit assigiinngitsorpassuit pisariaqartinneqarput imigassamillu atuineq meeqqatsinnut inuusuttortatsinnullu ajoqutaanngitsoq anguniagaq angussagutsigu tamatta tapeeqataanissarput pisariaqarpoq, Naalakkersuisoq Agathe Fontain (IA) inatsisup akuersissutigineqarneranut atatillugu ilaatigut oqarpoq.

Siumut sinnerlugu Inatsisartunut qinigassanngortittoq, Nicolai J. Nissen, partii sinnerlugu allatut isumaqarpoq.

– Aap, nalunngikkaluarpara aalakoornartoq pillugu inatsimmut naalagaaniartumut Siumut akuerseqataasimagaluartoq. Inatsit taanna unammilleqatigiinnermut equtitsisuuvoq, naqisimanninnermik takutitsivoq aamma meerartatta atugarissaarnissaanut misilittaaneruvoq, tassami inuppassuit angerlarsimaffimminni aalakkuttalertussaassapput. Tamannalu Siumup politikkerinngilaa, Nicolai J. Nissen allappoq.

– Naalakkersuinikkut suleqatigiinnermi ilaatigut inatsisit partiip nammineq politikkerisaanut akerliusut akueralugit taasisoqartariaqartarpoq. Kisianni tamanna aamma isumaqarpoq, qinersereernerup kingorna inatsit allanngortikkuminarnerussasoq, Nicolai J. Nissen oqarpoq.

 

Aaqqissuisut

Nunarput pillugu sammisaqarfik

%d bloggers like this: